Ուսուցչուհի էր, գործունյա կին. ականատեսները՝ Դավիթաշենում բնակարանից ավտոմեքենայի վրա ընկած ու մահացած կնոջ մասին. նոր մանրամասներ (տեսանյութ)

Tert.am-ը գրում է.

Երևանի Դավիթաշեն 3-րդ թաղամասի թիվ 31 շենքի մոտ 6-րդ հարկից ընկած ու մահացած կինը ուսուցչուհի է եղել. ընտանիքը եկել է Վայքից ու շենքում ապրում են վարձով: Այս մասին Tert.am-ի հետ զրույցում պատմեց մահացած կնոջ հարևանուհին` Ռուզան Վարժապետյանը։

Թիվ 31 շենքի մոտ շինարարական աշխատանքներ կատարող բանվորներից մեկն էլ պատմեց, որ ականատես է եղել, թե ինչպես է տարեց մի կին ընկնում ավտոմեքենայի, այդտեղից էլ` սառցապատ ասֆալտի վրա:

«Հարցրինք` ասին ընկել ա, մի 58 տարեկան կին է: Էդ ենք տեսել, ցավակցեցինք, ախպերն էր էլ ստեղ, էսքանը»,- Tert.am –ին պատմեց  տղամարդը:
Հիշեցնենք, որ ԱԻՆ-ը երեկ հայտնել էր, որ նշված թաղամաս ահազանգով մեկնել է  Ճգնաժամային կառավարման ազգային կենտրոնի օպերատիվ խումբը և մեկ մարտական հաշվարկ, այնտեղ հայտնաբերել է
Հ. Ա.-ի դին, որն  ընկել է նույն շենքի բակում կայանված «BMW 325» մակնիշի 87 MT 087 պ/հ ավտոմեքենայի վրա:

Մահացած կնոջ հարևանուհին` Ռուզան Վարժապետյանը Tert.am-ի հետ զրույցում մահացած կնոջ ընտանիքի անդամներին շատ դրական գնահատեց.

«Կինը ուսուցչուհի էր, նրանց ընտանիքը եկել է Վայքից  ու շենքում ապրում են վարձով։ Աշխատող, նորմալ ընտանիք է, տղան տաքսու վարորդ է, մյուսը մեքենայի վրա էլեկտրականության գործ է անում, աղջիկը նույնպես, ինքն էլ աշխատող, գործունյա կին էր երևում, չրեր էր փռում, թթու լավաշներ»,-պատմեց տիկին Ռուզանը, որը մոտակա խանութում աշխատելով՝ շատ շփվել է կնոջ երեխաների հետ: 

Տիկին Ռուզանը կնոջ 6-րդ հարկից վայր ընկնելու կամ ցած նետվելու վերաբերյալ իրարամերժ տվյալներ հաղորդեց. նախ ասաց, որ կնոջ ոտքն է եղել կոտրված, ապա ասաց. «Հոգեկան է, թե ոչ՝ չիմացանք, բայց ասում էին, որ հոգեկան վիճակը լավ չէ»:

ՀՀ ոստիկանության լրատվության ու հասարակայնության հետ կապերի վարչությունից Tert.am-ին հայտնեցին, որ մեկնած օպերատիվ խումբը պարզել է, որ կինը ինքնասպանություն է գործել` ցած նետվելով 6-րդ  հարկից:

 Անի Գևորգյան