Փաշինյանի վախվորած արձագանքը Ռուսաստանի նախագահին

Հայաստանի վարչապետի պաշտոնը զբաղեցնող Նիկոլ Փաշինյանը երեկ, ի վերջո, ստիպված է եղել դժկամությամբ պատասխանել Ռուսաստանի նախագահ Վլադիմիր Պուտինի հայտարարություններին։ Պուտինը, հիշեցնենք, հայտարարել էր, թե և՛ Հայաստանի քաղաքացիների, և՛ Ռուսաստանի՝ որպես հիմնական տնտեսական գործընկերոջ համար ճիշտ կլինի, որ Երևանը հնարավորինս արագ որոշում կայացնի Եվրամիությանը միանալու վերաբերյալ։

«Ճիշտ կլիներ թե՛ Հայաստանի բնակչության, քաղաքացիների նկատմամբ, թե՛ մեր՝ որպես տնտեսական գլխավոր գործընկերոջ նկատմամբ, հնարավորինս շուտ կողմնորոշվել, օրինակ՝ հանրաքվե անցկացնել։ Դա մեր գործը չէ, բայց սկզբունքորեն տրամաբանական կլիներ հանրաքվե անցկացնել և հարցնել Հայաստանի քաղաքացիներին՝ ինչպիսի՞ն կլինի նրանց ընտրությունը։ Դրան համապատասխան էլ մենք ևս համապատասխան եզրակացություններ կանեինք և կգնայինք փափուկ, ինտելիգենտ և փոխշահավետ ապահարզանի ճանապարհով»,- ասել էր Ռուսաստանի նախագահը։

Արձագանքելով Պուտինի հայտարարություններին՝ Փաշինյանը կրկնել է արդեն մեկ տարի շարունակվող իր թեզը․ Հայաստանը որոշում կկայացնի, երբ պահը հասունանա, այժմ և առաջիկա շրջանում Երևանը Եվրասիական տնտեսական միությունից դուրս գալու անհրաժեշտություն չունի։

«Ես համաձայն չեմ նաև ապահարզան ձևակերպման հետ, որովհետև ես Ազգային ժողովում էլ եմ առիթ ունեցել ասելու, որ մենք միջպետական հարաբերությունները երբեմն շփոթում ենք ամուսնության հետ, ես այդ ձևակերպման հետ համաձայն չեմ։ Հայաստանի Հանրապետությունը միջպետական հարաբերություններում առաջնորդվում է միջպետական տրամաբանությամբ։ Էլի եմ ասում՝ քանի դեռ անհրաժեշտություն չի առաջացել, մենք չենք պատրաստվում որևէ այդպիսի հարց դնել՝ նաև հանրաքվե, կանենք այն պահին, երբ օբյեկտիվ անհրաժեշտություն լինի»,- ասել է Փաշինյանը։ Նա նաև հայտարարել է, որ Երևանը Ռուսաստանի շահերը վնասելու նպատակ չունի․ «Մենք չենք ներքաշվելու վիճաբանության, լեզվակռվի մեջ, և մենք բոլոր հարցերը քննարկելու ենք աշխատանքային պայմաններում՝ առանց լրացուցիչ նյարդի»։

Փաշինյանի այս վախվորած արձագանքը վկայում է, որ նա էլ հասկանում է Հայաստանը Ռուսաստանի ազդեցության գոտուց հանելու հետևանքները, բայց այլ տարբերակ պարզապես չունի։ Ընդ որում՝ նա փորձում է զուտ պահպանել հարաբերությունների իմիտացիան մինչև խորհրդարանական ընտրություններ։ Դրանից հետո արդեն պարզ կլինի Փաշինյանի հետագա ճակատագիրը։

Անգելինա Մինասյան