Հնագետները հայտնաբերել են 2500-ամյա գրիչ՝ հին հունական Դիոնիսոս աստծո բաց պատկերով

Սիցիլիայում աշխատող հնագետները հայտնաբերել են անտիկ ժամանակների առօրյա կյանքի հազվադեպ եւ տպավորիչ առարկա ՝ ոսկրե ստիլուս, որը թվագրվում է մ.թ.ա. V–IV դարերով, այսինքն՝ այն մոտ 2500 տարեկան է, գրել է Live Science-ը։

Առաջին հայացքից դա սովորական գործիք է մոմե աղյուսների վրա գրելու համար, բայց նրա դեկորատիվ ձեւավորումը գտածոն իսկապես արտասովոր է դարձնում։

Ստիլուսի ծայրերից մեկին պատկերված է հին հունական գինու, էքստազի եւ կենսական ուժի աստված Դիոնիսոսը։ Կերպարը ներկայացված է բնորոշ անտիկ ձեւով. աստվածության կերպարն ուղեկցվում է ֆալոսի ընդգծված սիմվոլիկայով, որն ուղիղ հղում է բեղմնավորման, առատության եւ կյանքի մշտական թարմացման գաղափարներին։ Ժամանակակից հայացքի համար այս բացությունը կարող է անսպասելի թվալ, բայց արխայիկ եւ դասական շրջանների հունական մշակույթի համար  այն միանգամայն նորմատիվային է եւ խորապես խորհրդանշական։

Հետազոտողներն ընդգծել են, որ նման պատկերումները  ցնցում առաջացնելու նպատակ չեն ունեցել։ Հակառակը, դրանք արտացոլել են իրենց ժամանակի կրոնական պատկերացումները, որոնցում ֆիզիկական բեղունությունը, սեքսուալությունը եւ կենսական էներգիան դիտարկվել են որպես աստվածային կարգի դրսեւորումներ։

Դիոնիսոսը, որի պաշտամունքը կապված է եղել գինեգործության, տոների եւ սոցիալական սահմանափակումներից ազատագրվելու հետ, հաճախ պատկերվել է հենց այդպես՝ որպես անզուսպ կենսական ուժի մարմնավորում։

Առանձնակի հետաքրքրություն է առաջացնում առարկայի ընտրությունը։ Ստիլուսները անձնական իրեր էին, որոնք մշտապես գտնվել են տիրոջ մոտ։ Դա թույլ է տալիս ենթադրել, որ պատկերը ոչ միայն դեկորատիվ, այլեւ ապոտրոպեիկ նշանակություն  է ունեցել, այսինքն՝ ծառայել է որպես ինքնատիպ հմայիլ կամ բարեկեցության, հաջողության եւ ստեղծարար էներգիայի խորհրդանիշ։