«Չորրորդ իշխանություն». ՀԷՑ-ը չի կատարում առաջին ատյանի վճիռը

«Երեկ «ՉԻ» խմբակցություն էր ահազանգել Արագածոտնի մարզի Արագած համայնքի 6-րդ փողոցի 16 տան բնակիչ Սուրիկ Հովհաննիսյանը, որը դժգոհեց, որ ՀԷՑ-ի աշխատակիցները անջատել են իր տան էլեկտրաէներգիան և արդեն մեկ տարուց ավելի է իր ընտանիքը ապրում է անմարդկային պայմաններում։

«ՉԻ» հետ զրույցում Հովհաննիսյանը նշեց. «ՀԷՑ-ի աշխատակիցները եկան, առանց իրական հիմքերի անջատեցին իմ տան հոսանքը՝ պատճառաբանելով, որ ես իբր թե ունեմ մեծ սառնարան և մետաղակտրիչ գործիք, և այդ պատճառով կարճ միացում է եղել, ինչը իրականությանը չի համապատասխանում, ես ոչ մեծ սառնարան ունեմ, ոչ էլ մետաղակտրիչ գործիք։

Նրանք ակտ կազմեցին, որը ստորագրել են Ապարանի ՀԷՑ– ի պետ Հ. Փարվանյանը, պետի տեղակալ Ա.Ավետիսյանը, Արագած-Ափնա տեղամասի պետ Կ. Բեյրությանը, ավագ ճարտարագետ Վ. Գասպարյանը, ճարտարագետ Ս. Քամալյանը։

Ի դեպ՝ ակտը կազմվել է առանց ընթերակաների, ինչը օրենքի կոպիտ խախտում է։ Ես դիմեցի առաջին ատյանի դատարան, որպեսզի միացնեն էլեկտրականությունը, և առաջին ատյանի դատարանը բավարարեց իմ պահանջը՝ անվավեր ճանաչելով վերոնշյալ ակտը, պարտավորեցնելով ՀԷՑ-ին՝ վերականգնել էլեկտրամատակարարումը։

Սակայն մինչև օրս առաջին ատյանի դատարանի վճիռը չի կատարվել։ Ավելին, ՀԷՑ-ր դիմել է վերաքննիչ դատարան, որը մինչև օրս լռում է։ Իմ ընտանիքն էլ շարունակում է  մնալ առանց էլեկտրաէներգիայի ու առանց դրանով պայմանավորված տարրական ծառայությունների»»,–գրում է թերթը։

Մանրամասները՝ թերթի այսօրվա համարում։