Ո՞վ է ընդհանրապես Արմեն Գրիգորյանը, մենք հարց ենք տալիս՝ լուրջ իրավիճակ է Սյունիքում, որտե՞ղ է Փաշինյանը, չի՞ կարող պաշտոնական դիմում ստորագրել. Մոդեստ Կոլերով

«Արմեն Գրիգորյանն ասաց, որ կդիմի ՆԱՏՕ-ին և ԱՄՆ-ին, իսկ ինչո՞ւ չի դիմում: Կրկի՞ն առևտուր: Ո՞րն է ՆԱՏՕ ամենամոտ երկիրը Հայաստանին, Թուրքիա՞ն, իսկ նա Թուրքիայի՞ն է դիմում»,- այս մասին 168.am-ի հետ զրույցում վրդովմունք հայտնեց ՌԴ առաջին կարգի պետական վերլուծաբան, «Ռեգնում» լրատվական գործակալության գլխավոր խմբագիր Մոդեստ Կոլերովը` անդրադառնալով հայ-ադրբեջանական սահմանին ստեղծված իրավիճակին, ինչպես նաև ՀՀ ԱԽՔ Արմեն Գրիգորյանի հայտարարությանը, թե ՀՀ-ն դիմում է ՌԴ-ին օգնության ակնկալիքով:

Հիշեցնենք, որ այսօր մարտական թեժ գործողություններ են սկսվել հայ-ադրբեջանական սահմաններին, ինչի հետևանքով, ըստ ՀՀ ՊՆ-ի՝ հայկական կողմն ունի զոհեր, վիրավորներ և գերեվարված 17 զինծառայողներ:

«Հանրային» ՀԸ եթերում Անվտանգության խորհրդի քարտուղար Արմեն Գրիգորյանը հայտարարեց, որ «այս համատեքստում մենք կարևոր ենք համարում ընդգծել, որ քանի որ հարձակումը եղել է ՀՀ սուվերեն տարածքի վրա, ապա մենք դիմում ենք ՌԴ-ին՝ ՀՀ-ի և ՌԴ-ի միջև գոյություն ունեցող 1997 թվականի պայմանագրի շրջանակներում ՀՀ տարածքային ամբողջականությունը պաշտպանելու կոչով և համաձայնագրի շրջանակներում փոխադարձ պարտականություններն իրագործելու տրամաբանության շրջանակներում»։ Հարցին՝ սա պարզապես բանավո՞ր դիմում է, թե՞ համապատասխան ընթացակարգ կա, Գրիգորյանը պատասխանել է, թե բանավոր դիմում է, որը նաև գրավոր ընթացակարգ է ունենալու։

Արմեն Գրիգորյանը չէր բացառել, որ համապատասխան արձագանքի բացակայության դեպքում ՀՀ-ն կդիմի ՆԱՏՕ-ին կամ արևմտյան այլ գործընկերների: Գրավոր տեսքով ՌԴ-ին դիմելու մասին որևէ տեղեկատվություն չկա:

Մոդեստ Կոլերովն ասաց, որ Բաքվի նպատակները պարզ են՝ Բաքուն ցանկանում է միջանցքի ճեղքում, որի մասին երազում է և դա չի էլ թաքցնում:

Նա նշեց, որ Արմեն Գրիգորյանի հայտարարությանը ծանոթ է, բայց կցանկանար, որպեսզի Արմեն Գրիգորյանն իրականում խոսեր ոչ թե այն մասին, թե ինչ է ցանկանում անել, այլ որպեսզի նա խոսեր արդեն ընդունված որոշման մասին երկրի առաջին կամ երկրորդ դեմքի կողմից՝ պաշտոնական դիմում ՀԱՊԿ գործընկերներին, կամ ՆԱՏՕ-ին, ԱՄՆ-ին:

«Մենք Ձեզ հետ շատ լավ գիտենք և հասկանում ենք, որ ինչ-որ մեկի դիմելը համացանցով կամ հեռուստատեսային եթերով՝ դա դիմում չէ, դա քարոզչություն է, ես կցանկանայի լսել, որ Հայաստանը նախագահի կամ վարչապետի ստորագրությամբ պաշտոնապես դիմել է վերոնշյալ երկրներին՝ ՌԴ-ին, ՆԱՏՕ-ին, ԱՄՆ-ին:

Երեկ չէ առաջին օրը հենց Արմեն Գրիգորյանը շատ այլ բաներ էր խոսում, իսկ հիմա խոսում է այլ բան: Ես չեմ ցանկանում առանձնապես անձերից խոսել, բայց Արմեն Գրիգորյանը ոչ մի դեպքում ՀՀ իշխանության վստահելի աղբյուր չէ և այն անձը չէ, ում ռեպլիկներին լուրջ է պետք վերաբերվել:

Մեզ բոլորիս պետք է պաշտոնական դիմում ՀՀ իշխանությունների կողմից: Մեզ պետք է ոչ թե եթեր, այլ կոնկրետ դիմում, որից հետո մենք կրկին կտեսնենք այն, ինչ մենք տեսել ենք մշտապես՝ ՀԱՊԿ-ը պարալիզացված է, որի մասին ես Ձեզ ասել եմ բազմաթիվ անգամներ, կարծում եմ՝ հույսեր չկան ՀԱՊԿ-ի հետ կապված, և այսպես՝ ուղիղ դիմում ՌԴ-ին ռազմական աջակցության համար, դա կա՞»,- հռետորական հարցով իր կարծիքը նշեց Մոդեստ Կոլերովը:

Նա զարմանքով նշեց. «Իսկ քանի՞ վայրկյան է հարկավոր նման դիմում գրելու համար: Ավելի քիչ ժամանակ է հարկավոր, քան հեռուստատեսային հարցազրույց տալը: Պետք է սկզբից գրել գրավոր դիմում, իսկ հետո արդեն հանդես գալ եթերով, նա դա արե՞լ է: Երևի թե ոչ, քանի որ մենք կիմանայինք այդ մասին: Իսկ ի՞նչ է՝ նա ունի՞ բավարար կարգավիճակ նման դիմում անելու համար, իսկ նա ընդհանրապես ո՞վ է: Նա պարզապես ԱԽ քարտուղար է: Նա ՀՀ բարձրագույն ներկայացուցիչ չէ: Կասկածում եմ, եթե նա լիներ ՀՀ բարձր ներկայացուցիչը, ապա մենք հստակ կիմանայինք, թե որն է ՀՀ դիրքորոշումը, նա մեկ մի բան է ասում, մեկ՝ այլ:

Նա ասաց նաև, որ կդիմի ՆԱՏՕ-ին և ԱՄՆ-ին, իսկ ինչո՞ւ չի դիմում: Կրկի՞ն առևտուր: Ո՞րն է ՆԱՏՕ-ի ամենամոտ երկիրը Հայաստանին, Թուրքիա՞ն, իսկ նա Թուրքիայի՞ն է դիմում»:

Հարցին, եթե լինի գրավոր դիմում, ինչպես է արձագանքելու ՌԴ-ն, Մոդեստ Կոլերովը պատասխանեց, որ եթե լինի գրավոր դիմում, ՌԴ-ն կներդնի բոլոր ջանքերը, որպեսզի ցույց տա՝ ՀԱՊԿ-ը պարալիզացված է, ՆԱՏՕ-ն «ձեռքերը լվանում է», միակ հույսը ՌԴ դիրքորոշումն է:

«Երբ լինի ուղիղ դիմում, մենք կմաղթենք հաջողություն այդ դիմումին: Արմեն Գրիգորյանը խորհրդատվական մարմնի քարտուղար է, նա գործադիր իշխանություն չէ, ո՞վ է նա: Մեզ պետք է արդյունք, չէ՞, ոչ թե PR: Շատ վատ է այն, ինչ տեղի է ունենում, սակայն կանխատեսելի է, քանի որ վերջին նահանջը երկու դիրքերից նախադեպ է ստեղծում, որ հայերը, եթե այդ երկուսը հանձնել են, ապա շարունակելու են նահանջել»,- ասաց նա:

Կոլերովն ասաց, որ Ադրբեջանն ամեն կերպ ընդլայնում է իր բանակցային դիրքերը, քանի որ ամեն դեպքում բանակցություններ լինելու են: Նա հիշեցրեց, որ Արմեն Գրիգորյանը վերջերս հայտարարել էր, որ չկա բանակցություն դեմարկացիայի շուրջ:

«Նա դա ասել էր, այդ դեպքում ի՞նչ սահման է նա պաշտպանում, անհասկանալի է: Ես չեմ կարծում, որ Արմեն Գրիգորյանը լուրջ անձ է: Կներեք, որ Ձեր գործերին միջամտում եմ, բայց դա այն մարդը չէ: Նա Փաշինյանի ներկայացուցիչը չէ, ներկայացուցիչը մամուլի քարտուղարն է: Իսկ Փաշինյանն ինքը չի՞ կարող ասել երկու խոսք: Նա չի՞ կարող պաշտոնական դիմում ստորագրել, ի՞նչ է՝ ամո՞թ է նման բան անել: Լուրջ իրավիճակ է Սյունիքում՝ որտե՞ղ է Փաշինյանը, մենք հարց ենք տալիս՝ որտե՞ղ է նա: Այլ դեպքերում ամեն առիթով ելույթ է ունենում: Ինչո՞ւ է հիմա լռում»,- ասաց նա՝ հույս հայտնելով, որ ՌԴ-ին կլինի պաշտոնական դիմում:

Մեր արձագանքին՝ իսկ եթե չլինի՞ նման բնույթի դիմում, Կոլերովն ասաց. «Եթե չդիմեն, ապա դա դատարկախոսություն է: Ի՞նչ է, մտածում են, թե այստեղ բոլորը նստած հետևում են Արմեն Գրիգորյանի յուրաքանչյուր փռշտոցին, որ նստած նրա ամեն բառը սղագրո՞ւմ են: Եթե այդպես է, դա նշանակում է՝ «мания величия», ոչ թե պաշտոնական դիմում»: