Անսպասելի առողջական խնդիրներ. COVID-19-ի 5 ամենալուրջ հետևանքները

ՀԱՍԱՐԱԿՈՒԹՅՈՒՆ 7 Май, 2021 9:46

COVID-19 տարած յուրաքանչյուր տասներորդ մարդու մոտ արձանագրվել են հեռավոր հետևանքներ, օրինակ, քրոնիկ երիկամային անբավարարություն կամ տեսողության կտրուկ վատացում:

«Իզվեստիայի» փոխանցմամբ՝ կորոնավիրուսային վարակի հինգ հիմնական հետևանքներ կան: Պարբերականը դրանք առանձնացրել է մասնագետների հարցման և գիտական ամսագրերում հրապարակումների հիման վրա։

Սրտանոթային համակարգ

Կորոնավիրուսային վարակը կարող է սրտամկանի նյութափոխանակության խանգարում առաջացնել։ Բացի այդ, վարակի ժամանակ հաճախ կան այնպիսի բարդություններ, ինչպիսիք են սրտի ռիթմի խանգարումներն ու միոկարդիտները (սրտամկանի բորբոքում)։

Երիկամներ

Յեյլի համալսարանի բժշկական դպրոցի գիտնականները հետազոտել են երիկամների սուր վնասվածքով 1,6 հազար հիվանդների։ Նրանց մեջ եղել են կորոնավիրուսով վարակված մարդիկ, որոնց մոտ պաթոլոգիա է հայտնաբերվել հիվանդանոցում գտնվելու ժամանակ:

Ամերիկացի գիտնականների տվյալներով՝ COVID-19-ով հիվանդանոց տեղափոխվածների 24-57 տոկոսի ու ինտենսիվ թերապիայի բաժանմունքներում բուժվողների 61-ից մինչև 78 տոկոսի մոտ կորոնավիրուսն ուղեկցվում է երիկամների վնասմամբ: Բժիշկները հիվանդների վիճակը ստուգել են դուրս գրվելուց 21 օր անց ու պարզել, որ կորոնավիրուսային վարակ տարած հիվանդների մոտ երիկամների սկզբնական գործառույթը չի վերականգնվել: Վարակվածների մոտ նաև քրոնիկական երիկամային անբավարարության զարգացման ավելի բարձր ռիսկ է եղել։

Տեսողությունը

Չինաստանի Վենչժոու բժշկական համալսարանի ակնաբուժական հիվանդանոցի ցողունային բջիջների ու ցանցաթաղանթի վերականգնման լաբորատորիայի գիտնականները հրապարակել են հետազոտություն, որում ամփոփել են կորոնավիրուսի առաջացրած տեսողական համակարգի հիվանդությունների վերաբերյալ առկա բոլոր նյութերը: Հեղինակները առանձնացրել են երկու ռեցեպտորներ, որոնց միջոցով SARS-CoV-2 կարող է վնասել աչքերը։

Համն ու հոտը

Հոտառությունը քթի խոռոչի լորձաթաղանթի ռեցեպտորային բջիջների, անցկացնող նյարդային մանրաթելերի և ուղեղի հոտառության կենտրոնի բարդ համակարգ է։ Ցանկացած օղակի աշխատանքի խախտման դեպքում հոտերի ընկալումը խախտվում է։

Որպես կանոն, հոտառությունը COVID-ի ժամանակ խախտվում է հիվանդության չորրորդ-յոթերորդ օրը, հիվանդների մեծ մասի հոտառությունը վերականգնվում է 14 օրվա ընթացքում: Սակայն կան տվյալներ հոտառություն խանգարումների ավելի երկար ընթացքի մասին:

Հետազոտության արդյունքների համաձայն՝ ամբողջական վերականգնումը տևում է երեք օրից մինչև երեք ամիս: Նման դեպքերում չարժի ինքնաբուժությամբ զբաղվել, խորհուրդ է տրվում ախտանիշների ի հայտ գալուց հետո հնարավորինս շուտ դիմել մասնագետի: Անթույլատրելի է օգտագործել ավանդական բժշկության միջոցները, իրականացնել հոտառության թեստեր սուր հոտավետ նյութերով, որոնք կարող են վնասել քթի լորձաթաղանթը (օրինակ, ամոնիակ):

Աղեստամոքսային տրակտը

COVID տարած մարդկանց մոտ առավել հաճախ նկատվում են էնտերիտի՝ փոքր աղիքներում բորբոքման ախտանշաններ, որոնք հանգեցնում են լորձաթաղանթի փոփոխման: Խանգարվում է մարսողության ու օգտակար տարրերի յուրացման գործընթացը։

Մասնագետներն ընդգծում են, որ այդ բոլոր հետևանքներից խուսափելու միակ միջոցը պատվաստումն է։