Ռուսական իշխանությունները անցանկալի հայերի սև ցուցակ ունեն․ ովքեր են նրանք

«Հրապարակը» գրում է․
Երբ Հայաստանում ռուսական դեսպան Իվան Վոլինկինը հայտարարեց, որ անհրաժեշտ է Հայաստանում չեզոքացնել այն բոլոր ՀԿ-ները, որոնք վնասում են հայ-ռուսական հարաբերություններին, հայաստանյան ինչպես հասարակական, այնպես էլ քաղաքական դաշտը բավական սուր եւ բուռն արձագանքեց, ինչը չի կարելի ասել իշխանությունների մասին եւ այդ հայտարարությունն իր համարժեք արձագանքը պաշտոնական Երեւանի կողմից չունեցավ, Վոլինկինին էլ չբացատրվեց, որ առնվազն անթույլատրելի է երբ դեսպանը այլ պետության ներքին գործերին է միջամտում: Հետո այդ ամենը մոռացվեց, անցավ-գնաց օրավուր հոգսերի հորձանուտում:

Սակայն պարզվում է՝ ռուսական կողմը իր դեսպանի հայտարարությունը բավականին լուրջ է ընդունել, այնքան լուրջ, որ, ամենայն հավանականությամբ, նստել, ուսումնասիրել են հայաստանյան հասարակական կազմակերպությունները, լրատվադաշտը, հատկապես՝ օնլայն հարթակները եւ թերեւս արդեն առանձնացրել այն կազմակերպությունների եւ անհատների ցանկը, որոնք իրենց համար անցանկալի են:

Օրերս հայաստանյան ամենից հարգված փորձագետներից մեկի` Ստեփան Գրիգորյանի հետ տեղի ունեցածը, կարծես թե, ապացուցում է մեր կողմից վերեւում ասվածը, քանի որ հայտնի վերլուծաբանը ընդգծված արեւմտամետ կողմնորոշում ունի եւ երբեք էլ չի թաքցրել իր հայացքները ռուս ժողովրդի հանդեպ ունեցած հարգանքով հանդերձ: Այս միջադեպն ակամա հիշեցնում է Վոլինկինի հայտարարությունը:
Այս միջադեպը նաեւ այլ հարց է մեջտեղ բերել. այսպես կոչված «սեւ ցուցակի» եւ մատնագրերի մասին:

Մենք փորձեցինք ուսումնասիրել օնլայն մամուլը եւ բավականին հետաքրքիր հրապարակումներ գտանք, որոնք ակամա մի կողմից բերում են այն մտքին, որ գուցե եւ կա այդ սեւ ցուցակը, եւ մյուս կողմից հուշում, որ ռուսները ամենայն հավանականությամբ իրենց անձնվեր աջակիցներն ունեն հենց հայաստանյան հասարակության ներսում, ովքեր պարզ ասած՝ «արջի ծառայության» ոլորտից այն կողմ չեն անցնում: Եվ այսպես՝ ռուսական REGNUM-ը, հղում տալով «Ноев Ковчег»ին, հրապարակվել է Սերգեյ Հակոբյանի՝ «Ովքեր են ուղղորդում հակառուսական տրամադրությունները Հայաստանում» վերտառությամբ հոդվածը, որը մասնակի հայերեն թարգմանությամբ հրապարակվել է նաեւ «Հրապարակում» :

Այս հոդվածում արդեն շրջանառվում են բավական թվով մարդկանց` գործիչների, լրագրողների եւ վերլուծաբանների անուններ, ովքեր հոդվածագրի կողմից նկատվում են որպես հակառուսական տրամադրություններ սերմանող եւ տարածողներ:
Այսպես, հոդվածում այս կամ այն կերպ շոշափված են հետեւյալ անձանց, հեղինակների եւ կառույցների անունները`

• Մայդանի հետ համերաշխության հայկական կոմիտե
• Հիմնադիր Խորհրդարան
• Ժիրայր Սեֆիլյան
• Դավիթ Շահնազարյան
• Ռուբեն Մեհրաբյան
• Աղասի Ենոքյան
• Եղիազար Այնթապցի, Հովհան Մանդակունի (1in.am)
• Հովհաննես Իգիթյան
• Էդմոն Մարուքյան
• Խաչատուր Քոքոբելյան:

Հոդվածագրի համար սրանք իր կողմից ռուսերենով կազմած ցանկն է, որը հրապարակվել է նյութի մեջ: