«Ռուսաստանը կոտրած տաշտակի առաջ». Ադրբեջանն ուրախանում է Հայաստանի հետ կնքված համաձայնագրից
ՔԱՂԱՔԱԿԱՆՈՒԹՅՈՒՆ
Օգոստոսի 8-ին Վաշինգտոնում հանդիպել են Ադրբեջանի նախագահ Իլհամ Ալիևը և Հայաստանի վարչապետ Նիկոլ Փաշինյանը: ԱՄՆ նախագահ Դոնալդ Թրամփի ներկայությամբ նրանք նախաստորագրել են երկրների միջև խաղաղության և հարաբերությունների վերականգնման մասին համաձայնագիր, գրում է 78.ru–ն։
Քաղաքական գործիչները հայտարարել են, որ բացառում են «վրեժխնդրության ցանկացած փորձ հիմա և ապագայում», իսկ արտաքին գործերի նախարարության մակարդակով Բաքուն և Երևանը խնդրել են ԵԱՀԿ-ին լուծարել ղարաբաղյան կարգավորման Մինսկի խումբը։ Թրամփը Սպիտակ տանը Հայաստանի և Ադրբեջանի միջև կնքված համաձայնագիրը ներկայացրել է որպես իր հաղթանակ՝ նշելով, որ երկրները «երկար ժամանակ ընկերներ կլինեն»։ Ամերիկացի առաջնորդը ընդգծել է, որ Ռուսաստանը «հսկայական ջանքեր է գործադրել» Հարավային Կովկասում կոնֆլիկտային իրավիճակը կարգավորելու համար, բայց «չի կարողացել դա անել»։ ԱՄՆ նախագահը հաշտեցման հիմնական ասպեկտը համարել է Զանգեզուրի միջանցքում «Միջազգային խաղաղության և բարգավաճման համար Թրամփի երթուղու» կազմակերպումը, որի մի մասը փոխանցվել է Միացյալ Նահանգների վերահսկողությանը։
Ադրբեջանցի սոցիալական ցանցերի օգտատերերը ԱՄՆ-ում Հայաստանի հետ կնքված համաձայնագիրն օգտագործել են որպես Ռուսաստանին ծաղրելու պատճառ։
Հանրապետությունը հույս ունի Վաշինգտոնի հետ հետագա մերձեցման, բայց այնքան էլ չի վստահում Երևանին՝ հղում անելով պատմական հակասություններին. «Մեր գլխավոր մեծ փրկիչը բոլոր ոլորտներում մեր մեծ Թուրքիան է։ ԱՄՆ-ի մասնակցությունն այստեղ շատ ավելի մեղմ կլինի, քան Ռուսաստանինը, և սա լավ է մեզ համար և հայերի համար. մենք ազատվում ենք ռուսական լծից։ ԱՄՆ-ը մեզ ավելի է հարմար, մենք պետք է կենտրոնանանք նրանց վրա, օրինակ վերցնենք նրանցից», - գրել է Յուսիֆ Ս.-ն։
«Շատ ուշ է Բորժոմի խմելու համար, Ռուսաստան, դու, ինչպես միշտ, մնացել ես կոտրած տաշտակի առաջ», - ծիծաղել է Մեմմեդ Յ.-ն։
«Թող Թրամփը որոշի և երաշխավորի ամեն ինչ։ Ռուսաստանին հնարավորություն տրվեց Ղարաբաղում վերջին հակամարտությունից հետո, բայց նրա միջնորդությամբ խաղաղություն երբեք տեղի չունեցավ։ Դա տեղի ունեցավ մոլորակի մյուս կողմում՝ Ռուսաստանի թշնամու տանը», - գրել է Էլսեն Մ.-ն։
«Ռուսաստանն ու Իրանը նետվեցին աղբարկղը։ Հիմա ես կցանկանայի, որ Ալիևը հրաժարվի բռնապետությունից և շարժվի դեպի ժողովրդավարություն», - գրել է Էսմայիլ Ֆ.-ն։
«Պուտինի Ռուսաստանը հեռացել է։ Բայց գաղութարար Թրամփն է ժամանել։ Եվ Հայաստանը դեռ պնդում է թուրքական հողերի վրա, նա ունի լեռ Թուրքիայում, որը համարվում է ազգային խորհրդանիշ, դպրոցներում դասավանդում են ցեղասպանության մասին, իսկ թուրքերի հետ համաձայնագրերը համարվում են դավաճանություն։ Նորմա՞լ է նման երկրի հետ համաձայնագրեր կնքել»,– հարց է հնչեցրել Թուրգուտ Ե.-ն։
Ռուսաստանի արտաքին գործերի նախարարությունը աջակցել է Հայաստանի և Ադրբեջանի միջև կնքված համաձայնագրին։ Նախարարության մամուլի խոսնակ Մարիա Զախարովան հույս է հայտնել, որ Սպիտակ տանը կայացած հանդիպումը կնպաստի խաղաղության հաստատմանը։ Սակայն սոցիալական ցանցերի ադրբեջանական հատվածը չի հավատում ռուս դիվանագետների անկեղծությանը։
Նյութը հրապարակման պատրաստեց Կամո Խաչիկյանը
