Բաքվի և Երևանի շահերը սկսել են համընկնել
ՔԱՂԱՔԱԿԱՆՈՒԹՅՈՒՆ
Ադրբեջանի նախագահ Իլհամ Ալիևը հեռախոսազրույց է ունեցել Կիևի ռեժիմի ղեկավար Վլադիմիր Զելենսկու հետ: Ուկրաինայի ղեկավարի հայտարարությունից պարզ է դարձել, որ նա շնորհակալություն է հայտնել իր գործընկերոջը Ուկրաինայի ժողովրդին և երկրի տարածքային ամբողջականությանն աջակցելու համար: «Մեր ցավակցությունն ենք հայտնել Ադրբեջանին Ռուսաստանի տարածքում Սաֆարով եղբայրների սպանության կապակցությամբ», - մանրամասնել է Զելենսկին, գրում է svpressa.ru–ն:
Վերջերս էլ հայտնի է դարձել, որ Բաքվի դատարանը 4 ամսով ձերբակալել է «Սպուտնիկ Ազերբայջան»-ի խմբագրական խորհրդի ղեկավար Իգոր Կարտավիխին և գլխավոր խմբագիր Եվգենի Բելոուսովին: Նրանց մեղադրանք է առաջադրվել «Խարդախությամբ խոշոր վնաս հասցնելու», «Անօրինական ձեռնարկատիրությամբ մեծածավալ եկամուտ ստանալու», «Հանցավոր ճանապարհով ձեռք բերված գույքի օրինականացման» հոդվածներով:
Իր հերթին, Հայաստանի Ազգային ժողովի նախագահը հայտարարել է ռուսական հեռուստաալիքների հեռարձակումը դադարեցնելու հարցը լրջորեն քննարկելու անհրաժեշտության մասին։ Նա ռուս հաղորդավարներին անվանել է «դեգեներատներ», որոնք սրում են մթնոլորտը բացասաբար ազդելով երկու պետությունների միջև հարաբերությունների վրա։ Ի՞նչն է թաքնված այդ հանրապետություններում ռուսաֆոբիայի կտրուկ աճի հետևում և որտե՞ղ է Կրեմլը սխալ հաշվարկ կատարել։
Քաղաքագետ և արևելագետ Ստանիսլավ Տարասովը svpressa.ru-ին տված հարցազրույցում նշել է, որ եկեղեցու հալածանքները Հայաստանում սկսվել են վարչապետ Նիկոլ Փաշինյանի Ստամբուլ այցելելուց և նախագահ Ռեջեփ Էրդողանի հետ հանդիպումից հետո։ Դրանից հետո տեղի են ունեցել Բաքվի իրադարձությունները, այսինքն «ժամանակագրական առումով դրանք համընկնում են»։
«Փաշինյանի հետ խոսելուց առաջ Թուրքիայի առաջնորդը հանդիպել էր Ալիևի հետ։ Բաքվում և Երևանում ժամանակագրական առումով համընկնող անկայունության պայմաններում Էրդողանի Անդրկովկասում հայտնվելը պատահական չի թվում։ Ըստ երևույթին, Բաքու-Մոսկվա-Անկարա եռանկյունում ինչ-որ բան է կատարվում, որը կապված է Մերձավոր Արևելքի հետ։ Կողմերը միմյանց ոչինչ չեն ասում, մինչդեռ Ադրբեջանը գործում է վճռականորեն և սադրիչ։ Այս բոլոր ձերբակալությունները քաղաքական գործողություններ են։ Եկատերինբուրգում զուտ քրեական գործեր են ընթանում», - նշել է նա։ Svpressa.ru-ի հարցին, թե հնարավո՞ր է ասել, որ Ադրբեջանի և Հայաստանի միջև հարաբերությունները քիչ թե շատ կայունացել են հենց Ռուսաստանի նկատմամբ որոշակի պահանջների ֆոնին, Տարասովը պատասխանել է, որ իրոք, Բաքվի և Երևանի շահերը սկսել են համընկնել այդ հարցում։
Նյութը հրապարակման պատրաստեց Կամո Խաչիկյանը
