Գևորգ Կոստանյանը բիզնես գործունեությամբ չի զբաղվել․ դատախազությունը պահանջում է բռնագանձել ենթադրյալ ապօրինի գույքը
ՔԱՂԱՔԱԿԱՆՈՒԹՅՈՒՆ
Հակակոռուպցիոն քաղաքացիական դատարանում այսօր՝ նոյեմբերի 28-ին, դատավոր Լիլի Դրմեյանի նախագահությամբ, շարունակվեց Գևորգ Կոստանյանի ենթադրյալ ապօրինի ծագում ունեցող գույքի բռնագանձման պահանջի մասին հայցադիմումի քննությունը։
Iravaban.net-ի փոխանցմամբ՝ նախնական դատական նիստին ներկայացել էին հայցով գլխավոր դատախազության ներկայացուցիչ Նելլի Տեր-Թորոսյանը և Արթուր Կարապետյանը, պատասխանող Գևորգ Կոստանյանի ներկայացուցիչ Վարազդատ Ասատրյանը։ Պատշաճ կերպով ծանուցվել, բայց չեն ներկայացել պատասխանող Լիլիթ Կոստանյանի ներկայացուցիչ Հայկ Ջհանգիրյանը և պատասխանողներ Արմեն Դավթյանը, Թերեզա Գևորգյանը։
Դատավորը մեջբերեց Ասատրյանի նախորդ նիստի պատճառաբանությունը, ըստ որի՝ Ասատրյանը չի հասցրել ուսումնասիրել դրանք և հարց ուղղեց հասցրե՞լ է արդյոք Ասատրյանը ուսումնասիրել դրանք։
Ասատրյանը հարցին ի պատասխան նշեց, որ իրեն հայցվորի կողմից չի տրամադրվել բանկային հաշիվների վերլուծությունները և ամբողջական պատկեր ստանալու խնդիր կա։
«Իմ ունեցած բոլոր գործերով, մեծ մասամբ, տրամադրվել են բանկային հաշիվները, բացառությամբ այս գործի։ Առանց դրանց արդյունավետ փաստական տվյալները բացահայտելու տեսանկյունից խնդիր ենք տեսնում։ Մենք բազում նիստերի ընթացքում եկել ենք այն եզրահանգման, որ ելակետային տվյալները կարևոր են։ Երբ ներկայացնում են տվյալներ 2 մասից է բաղկացած լինում բանկեր և հիմնականը։ Հիմա մենք բանկերը չունենք։ Կխնդրեմ կողմին տրամադրի նաև այդ ելակետային տվյալները, որովհետև առանց դրա թե դատարանի, թե մեր համար ի վերջո անհասկանալի է լինելու և մեծ հաշվով կարող է բերել նաև հայցի մերժմանը, որովհետև անհասկանալի է լինելու հայցվոր կողմի իրավական մոտեցումները կամ տրամաբանությունը, թե ինչպես են այդ թվաբանական մեծությունները համադրվել գործում։ Այսինքն մենք իրավական վերլուծություններից բացի պիտի գանք ենթադրության կամ գուշակության, որ էս-էս փաստերի հաստատման համար էս տողնա օգտագործվել»,- հավելեց Ասատրյանը։
Փաստաբանը դատարանին վստահեցնում էր, որ բանկային տվյալների բացակայությունը ամբողջական տվյալների պատկեր ստանալու անհնարինություն է առաջացնում։
Դատավորը առաջարկեց հարցերի միջոցով պարզաբանել նրա համար անհասկանալի հարցերը և դատախազին խնդրեց պարզաբանել, թե ինչ տրամաբանությամբ է կազմվել աղյուսակը։ Ըստ դատավորի՝ գուցե տվյալները պարունակվում են նյութերում և ուսումնասիրելու դեպքում հնարավոր է հայտնաբերել անհրաժեշտ տեղեկությունները։
«Հայցադիմումին կից ներկայացվել են նաև փաստական տվյալներ, որոնք պարունակում են նաև բանկային գաղտնիք համարվող տեղեկությունները։ Տրամադրված տվյալներում կա նաև ինֆորմացիա բանկային վճարումների մասին։ Իրավասու մարմինը ներկայացրել է այն աշխատանքային ֆայլը, որի հիման վրա հայցը ներկայացվել է դատարան։ Իրավասու մարմինը չունի հստակ օրինակ, որին ֆայլեր կազմելիս պետք է հետևել»,-ասաց Տեր-Թորոսյանը։
Ասատրյանի հարցին՝ այս ֆալյում առկա են արդյոք բանկային փոխանցումների, դրանց նույնականացման մասին տվյալներ, Տեր- Թորոսյանը պատասխանեց, որ վճարումները ընդգրկված են, բանկային փոխանցումները ներկայացված են «վճարումներ» բաժնում, որի «մեկնաբանություն» բաժնում ներկայացված են նաև բանկերի անունները, որոնցում ներդրվել են ավանդներ։
Դատախազության տնտեսագետ Կարապետյանը հավելեց, որ փոխանցումների մասով տվյալներն առկա են․ «Դուք կարող եք ֆայլի մեջ բացել և տեսնել, թե պարոն Կոստանյանին, ով ,որքան գումար է փոխանցել։ Նույն ձևով կարող եք տեսնել ծախսերը։ Նախորդ դատական նիստին մենք տրամադրել ենք այն, ինչ պայմանավորվել ենք տրամադրել։ Ապացույցների հետազոտման փուլում կարող ենք տվյալները հետազոտել և հարցերի պատասխանները գտնել»։
Ասատրյանը նշեց, որ ապացույցների հետազոտման փուլում պետք է նախ հասկանալ, որոնք են ապացույցները, այդ ապացույցը ինչ փաստի է հաստատված կամ էդ ապացույցը ինչ ձևով է դրսևորվել։
Կարապետյանը Ասատրյանի հարցադրումներին ի պատասխան բացատրեց, թե աղյուսակի, որ դաշտում ինչ տվյալներ են զետեղել։ Ըստ Կարապետյանի, քանի որ Գևորգ Կոստանյանը բիզնես գործունեությամբ չի զբաղվել, որպես օրինական եկամուտներ հաշվարկվել են Կոստանյանի եկամուտները, որոնք ստացել է աշխատավարձից, վարկերից, overdraft-ներից։ Մնացած ցանկացած փոխանցում, որը չի նույնականացվել դիտարկվել է ապօրինի մուտք։ Փայլում տվյալները ներկայացվել են տարիներով, ըստ որի` տարեկան եկամուտներին, սպառողական զամբյուղին գերազանցող յուրաքանչյուր գնում համարվել է ապօրինի եկամուտ։ Տոկոսային հարաբերությունը կազմվել է ելնելով նրանից, թե որքանով են Կոստանյանի ծախսերը գերազանցել եկամուտներին։
Տեր-Թորոսյանը վստահեցրեց՝ չի լինելու որևէ տվյալ, որը մնալու է չբացատրված և բոլոր հաշվարկները ստացվել են բանկային հաշիվների ուսումնասիրության արդյունքում։
Ասատրյանի խոսքով՝ հայցում ներկայացված չէ, թե ինչպես են եկել այն եզրահանգման, որ օրինական եկամուտի բաց կա, ինչին ի պատասխան Կարապետյանը նշեց, որ հաշվարկները կատարվել են տարեկան հաշվարկի տրամաբանությամբ և հնարավոր չէ օրական հաշվարկի տրամաբանությամբ ներկայացնել դրանք։
Ասատրյանը միջնորդություն ներկայացրեց դատարանին՝ տվյալների ուսումնասիրության ժամանակ խնդրելով, դատարանն այն բավարարեց։
Այս գործով հաջորդ դատական նիստը տեղի կունենա 2025 թվականի հունվարի 23-ին, ժամը 11։00։
