Գնդապետ Առնո Գուժոն. Ֆրանսիան մտադիր է ձեռք բերել Switchblade-ի խոյահարող զինամթերք
ՀԱՍԱՐԱԿՈՒԹՅՈՒՆ
Fin-journal.info-ն գրում է, որ վերջին շրջանում ֆրանսիացի զինվորականները կենտրոնացել են վերազինման վրա։ Այդ գործընթացն արագացել է ուկրաինական իրադարձությունների համատեքստում։ Ֆրանսիայի պաշտպանության նախարարությունն այժմ ակնկալում է առաջիկա ամիսներին ձեռք բերել AeroVironment Switchblade զինամթերք: Այդ մասին Eurosatory ցուցահանդեսում լրագրողներին ասել է ֆրանսիական բանակի պլանավորման ղեկավար, գնդապետ Առնո Գուժոնը:
Հետագայում Ֆրանսիայի պաշտպանության նախարարությունը Defense News հրատարակությանը նամակով հաստատել է, որ երկիրը դիմել է Switchblade հեռակառավարվող զինամթերք գնելու համար: Զինվորականները կարծում են, որ դրանց ձեռքբերումը զգալիորեն կբարձրացնի երկրի զինված ուժերի օպերատիվ կարողությունները։ Ավելի վաղ Պենտագոնը հայտարարել էր Ուկրաինային ռազմական օգնության շրջանակներում Switchblade զինամթերք տրամադրելու պլանների մասին: Հիմա զինամթերքի նկատմամբ հետաքրքրություն է ցուցաբերել նաև Ֆրանսիան։ Ֆրանսիացի զինվորականները ներկայումս ուսումնասիրում են այդ զինամթերքի օգտագործման հնարավորությունը, որը պետք է համարժեք լինի դրա գնիի հետ։ Ֆրանսիացի զինվորականներին ամենից շատ հետաքրքրում է զինամթերքի հեռահարությունը և ինքնավարությունը: Գնդապետ Գուժոնը նշել է, որ Հայաստանի և Ադրբեջանի միջև հակամարտությունում երկու կողմերն էլ օգտագործել են խոյահարող զինամթերք, և ղարաբաղյան իրադարձությունները իրենց շատ դասեր են տվել։
ԱՄՆ-ի Պետդեպարտամենտի անվտանգության և պաշտպանական համագործակցության բյուրոն իր հերթին որոշել է չմեկնաբանել այդ զենքի հնարավոր կամ ենթադրյալ փոխանցումների մասին, քանի դեռ ԱՄՆ-ի Կոնգրեսը չի տեղեկացվել այդ մասին: Նմանապես, AeroVironment-ը ևս չի մեկնաբանել այդ ամենը, սակայն, այնուամենայնիվ, նշել է որոշակի ռազմական հետաքրքրություն այդ զինամթերքի նկատմամբ:
Նյութը հրապարակման պատրաստեց Կամո Խաչիկյանը
