Բժիշկը նշել է երկու գործոն, որոնք որոշում են COVID-ի տևողությունը
ՀԱՍԱՐԱԿՈՒԹՅՈՒՆ
Ura.news-ը գրում է, որ կորոնավիրուսի հետևանքները երկար ժամանակ կհետապնդեն մարդուն, եթե նա հիվանդության ժամանակ կորցնի հոտառությունն ու համը։ Այդ մասին URA.RU-ին ասել է վարակաբան, Մոսկվայի մարզի Առողջապահության նախարարության երեխաների վարակիչ հիվանդությունների գլխավոր մասնագետ, պրոֆեսոր Ելենա Մեսկինան:
«Անոսմիայի ծանրությունը և դրա տևողությունը սովորաբար ցույց են տալիս վիրուսի կողմից նեյրոնների ավելի լուրջ վնասը: Մարդը կարող է արագ վերականգնվել, բայց նյարդային համակարգից կարող է բավականին երկար ժամանակ պահանջվել։ Նրանց համար, ովքեր լիովին կորցնում են իրենց հոտառությունն ու համը, այս ախտանիշները պահպանվում են շատ երկար, նույնիսկ մի քանի ամիս: Սա կարող է վկայել նյարդային ազդակներ փոխանցող նեյրոնների վրա վիրուսի ազդեցության մասին»,- նշել է Ելենա Մեսկինան։
Ինֆեկցիոնիստը պատմել է նաև, թե ովքեր են հակված կորոնավիրուսի ամենավտանգավոր հետևանքների դրսևորմանը: «Հիպերտոնիայով, գիրությամբ, շաքարային դիաբետով տառապող մարդիկ հակված են այնպիսի ծանր բարդությունների, ինչպիսիք են ինսուլտը, սրտի կաթվածը և թրոմբոզը: Սրտի քրոնիկ հիվանդությամբ տառապողները ևս երկար ժամանակ կունենան ախտանշաններ, իսկ վերականգնման համար երկար ժամանակ կպահանջվի»,- պարզաբանել է բժիշկը։
Ավելի վաղ քիթ-կոկորդ-ականջաբան, բարձրագույն կարգի դոկտոր, բժշկական գիտությունների թեկնածու Վլադիմիր Զայցևն ասել էր, որ կորոնավիրուսից հետո հոտառություն կորուստ ունեցող մարդիկ չեն բուժում այն։ Նրա խոսքով վերականգնման համար անհրաժեշտ են շնչառական վարժություններ, արոմաթերապիա և քթի հատուկ սփրեյների օգտագործում։
Նյութը հրապարակման պատրաստեց Կամո Խաչիկյանը
