ՀՀ Գիտությունների ազգային ակադեմիայում առերևույթ կատարված չարաշահումների վերաբերյալ ՀՀ քննչական կոմիտեում քննվում է 4 քրեական գործ

Մամուլում վերջերս հաճախ են գրում այն մասին, որ Գիտությունների ազգային ակադեմիայում լուրջ փոփոխություններ են սպասվում: Ըստ շրջանառվող լուրերի՝ գործող իշխանություններն այդ որոշմանը եկել են՝ հիմք ընդունելով Ակադեմիայի տարբեր հիմնարկներում կատարված ստուգումների արդյունքում հայտնաբերված խոշոր չափերի չարաշահումները:

Չարաշահումները հատկապես խոշոր չափերի են եղել Բյուրականի աստղադիտարանում՝ Ռադիկ Մարտիրոսյանի նախագահության տարիներին, 2006-2021 թվականներին: 

1or.am-ը գրավոր հարցում էր ուղարկել ՀՀ քննչական կոմիտեին՝ Գիտությունների Ազգային Ակադեմիայում ՀՀ ԿԳՄՍ նախարարության և նախաքննություն իրականացնող մարմինների կողմից հայտնաբերված չարաշահումների վերաբերյալ ստացված հաղորդումների և դրանց ուղղությամբ տարվող աշխատանքների վերաբերյալ տեղեկատվություն ստանալու համար:

Մեր հարցմանն ի պատասխան՝ քննչականից հայտնում են, որ ՀՀ Գիտությունների ազգային ակադեմիայում առերևույթ կատարված չարաշահումների վերաբերյալ ՀՀ քննչական կոմիտեում քննվում է 4 քրեական գործ, իսկ 1 քրեական գործով վարույթը կարճվել է: Այսպես. 

1. ՀՀ ԳԱԱ «Վ. Համբարձումյանի անվան Բյուրականի աստղադիտարան» ՊՈԱ կազմակերպության համապատասխան պաշտոնատար անձանց կողմից պաշտոնեական դիրքի չարաշահում, առանձնապես խոշոր չափերով յուրացում կատարելու և փաստաթղթեր կեղծելու դեպքերի առթիվ ՀՀ քննչական կոմիտեի Արագածոտնի մարզային քննչական վարչությունում ՀՀ քրեական օրենսգրքի 308-րդ հոդվածի 1-ին և 2-րդ մասերով, 179-րդ հոդվածի 3-րդ մասի 1-ին կետով և 325-րդ հոդվածի 1-ին մասով հարուցված թիվ 29107018 քրեական գործով ընթանում է նախաքննություն:

2. ՀՀ ԳԱԱ «Ա. Թախտաջյանի անվան Բուսաբանական ինստիտուտ» ՊՈԱ կազմակերպության համապատասխան պաշտոնատար անձանց և ծառայողների կողմից լիազորությունները չարաշահելու, պաշտոնական կեղծիք կատարելու դեպքերի առթիվ ՀՀ քննչական կոմիտեի Երևան քաղաքի քննչական վարչության Ավան և Նոր-Նորք վարչական շրջանների քննչական բաժնում ՀՀ Քրեական օրենսգրքի 308-րդ հոդվածի 1-ին և 2-րդ մասով, 214-րդ հոդվածի 1-ին մասով և 314-րդ հոդվածի առաջին մասով հարուցված թիվ 17870119 քրեկան գործով ընթանում է նախաքաննություն:

3. ՀՀ ԳԱԱ «Մ. Քոթանջյանի անվան Տնտեսագիտության ինստիտուտ» ՊՈԱ կազմակերպության համապատասխան պաշտոնատար անձանց կողմից առանձապես խոշոր չափերի յուրացում կատարելու դեպքի առթիվ ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական երկրորդ բաժնում ՀՀ Քրեական օրենսգրքի 179-րդ հոդվածի 3-րդ մասի առաջին կետով հարուցված թիվ 13114720 քրեկան գործով ընթանում է նախաքննություն:

4. ՀՀ ԳԱԱ «Գ. Դավթյանի անվան Հիդրոպոնիկայի պրոբլեմների ինստիտուտ» ՊՈԱ կազմակերպության համապատասխան պաշտոնատար անձանց կողմից առանձնապես խոշոր չափերի յուրացում և պաշտոնական կեղծիք կատարելու դեպքերի առթիվ ՀՀ քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժնում ՀՀ Քրեական օրենսգրքի 179-րդ հոդվածի 3-րդ մասի առաջին կետով և 14-րդ հոդվածի առաջին մասով հարուցված թիվ 61206220 քրեկան գործով ընթանում է նախաքննություն:

5. ՀՀ ԳԱԱ «Հ. Բունիաթյանի անվան Կենսաքիմիայի ինստիտուտ» ՊՈԱ կազմակերպության համապատասխան պաշտոնատար անձանց կողմից պաշտոնական դիրքի օգտագործմամբ խոշոր չափերի վատնում կատարելու, վատնում կատարելուն օժանդակելու, պաշտոնական կեղծիք կատարելու դեպքերի առթիվ ՀՀ քննչական կոմիտեի Երևան քաղաքի քննչական վարչության Քանաքեռ-Զեյթուն վրաչական շրջանների քննչական բաժնում ՀՀ Քրեական օրենսգրքի 179-րդ հոդվածի 2-րդ մասի 1-ին և 3-րդ կետերով 38-179-րդ հոդվածի 2-րդ մասի 1-ին և 3-րդ կետերով և 314-րդ հոդվածով քննված թիվ 31201720 քրեական գործով վարույթը կարճվել է ՀՀ քրեական դատավարության օրենսգրքի 37-րդ հոդվածի 1-ին մասով՝ գործում զղջալու հիմքով:                                                   

Մարիամ Նալբանդյան