Դիլիջանի համայնքապետարանում տեղյակ չեն՝ ինչու է իրենց միկրոավտոբուսն օգտագործվում ոստիկանության ուժերի շարժը Երևան քաղաքում ապահովելու նպատակով
ՀԱՍԱՐԱԿՈՒԹՅՈՒՆ
Ֆեյսբուքյան օգտատեր Էդգար Ղազարյանը ֆեյսբուքյան իր էջում ահազանգել էր.
«Դիլիջանի տեղական ինքնակառավարման մարմիններին տրամադրված և համայնքային շահերին սպասարկելու նպատակով Եվրոպական Միության համաֆինանսավորմամբ ձեռք բերված ավտոբուսն օգտագործվում է Հայաստանի ոստիկանության ուժերի շարժը Երևան քաղաքում ապահովելու նպատակով։
Թե այս խայտառակության համար երբ հրաժարական կտա Դիլիջանի քաղաքապետը, դա առանձին քննարկման հարց է, բայց որ Հայաստանում Եվրոպական Միության դեսպանը մեկ օր շուտ պետք է հետ կանչվի, այդ որոշումը Բրյուսելում հուսով եմ հնարավորինս շուտ կկայացվի»։
Վաղ առավոտից 1or.am-ը փորձում է կապ հաստատել Դիլիջան համայնքի ղեկավար Դավիթ Սարգսյանի հետ, բայց՝ ապարդյուն: Նախ աշխատակազմի քարտուղար Սոնա Եգանյանը նշեց, որ ոչնչից տեղյակ չէ՝ հորդորելով զանգահարել համայնքի ղեկավարին կամ նրա տեղակալին: Համայնքի ղեկավարի ընդունարանում մեզ հայտնեցին, որ վերջինս այդ պահին չի կարող պատասխանել մեզ և խոստացան փոխանցել Սարգսյանին:
Հետո զանգեցինք անձամբ համայնքի ղեկավարին, հեռախոսազանգին նրա օգնականը պատասխանեց, ով «վարսավիրանոցում» էր, խոստացավ ճշտել և կապ հաստատել մեզ հետ: Համայնքապետարանի մամուլի քարտուղար Արփի Թամրազյանն էլ նշեց, որ լիովին չի տիրապետում թեմային, բայց իրենց հասարակական տրանսպորտը վաղ առավոտից մինչև ուշ գիշեր սպասարկում է համայնքի բնակիչներին և չէր կարող լինել Երևանում:
Մարիամ Նալբանդյան
