Մի՞ֆ, թե՞ իրականություն. օգտակար խորհուրդներ անձամբ ատամնաբույժից

Բժիշկ-ստոմատոլոգ Մարիա Մարգարյանը 1or.am-ի հետ զրույցում խոսել է բերանի խոռոչի հիգիենայի և ատամների խնամքի նրբությունների մասին:

- Ատամների հետ կապված բոլոր հիվանդությունները առաջանում են բերանի խոռոչի վատ հիգիենայից:

- Իրականություն. ես կավելացնեի նաև վատ սովորություններն ու սնունդը:

- Ատամները պետք է մաքրել օրական 2 անգամ:

- Իրականություն. ատամները պետք է մաքրել օրական երկու անգամ, ուտելուց հետո: Ատամները պետք է մաքրել խոզանակի ուղղահայաց, կիսաշրջանաձև, ավլող շարժումներով, սկսելով ատամի հիմքից դեպի դուրս, նույնկերպ մաքրել ներսի մակերեսը, ատամների կտրող և ծամող մակերեսը:

- Պետք է մաքրել նաև լեզուն:

- Իրականություն. Ատամների մաքրումը պետք է ավարտել լեզուն մաքրելով: Սննդի մնացորդները կուտակվում են լեզվի տակ պտկիկների արանքում և հիանալի միջավայր են դառնում մանրէների զարգացման համար: Դրանից խուսափելու համար պետք է լեզուն մաքրել հատուկ խոզանակով: Նման գործողությունը օգնում է նաև նվազեցնել բերանից եկող հոտը: 

- Եթե ատամների վրա ատամնափառ կա, քարեր, առողջ ատամների և լնդերի մասին կարելի է մոռանալ:

- Իրականություն. Ոչ մեկի համար գաղտնիք չէ, որ այնպիսի հիվանդությունների հիմնական պատճառը, ինչպիսիք են ատամների կարիեսը, գինգիվիտը և պարօդոնտիտը, ատամների վրա առաջացած նստվածքներից են: Նստվածքներ ասելով, նկատի ունենք ատամնափառը և ատամնաքարը, որոնց մեջ պաթոլոգիական միկրոօրգանիզմներ կան: Այդ մանրէներն իրենց կենսագործունեության ընթացքում արտադրում են թթուներ, որոնք ագրեսիվ ազդեցություն ունեն և լնդերի վրա, առաջացնելով բորբոքում, և ատամների հյուսվածքի վրա, առաջացնելով կարիես:

- Անհրաժեշտ է կես տարին մեկ անգամ այցելել ատամնաբույժին:

- Իրականություն. ինչքան էլ մենք ինքներս լավ իրականացնենք հիգիենան, այցելություններն անհրաժեշտ են կանխարգելիչ զննման և բերանի խոռոչի պրոֆեսիոնալ հիգիենա անցկացնելու համար:

- Կոշտ մազիկներով ատամի խոզանակ կարող են օգտագործել բոլորը:

- Միֆ. Ատամի խոզանակը հիմնական գործիքն է ատամների և լնդերի մակերեսը մաքրելու համար: Բայց ամեն մի խոզանակ չէ, որ հարմար է դրա համար: Եթե ատամները գերզգայուն են կամ լնդերի արյունահոսության վտանգն է առկա կոշտ մազիկներով խոզանակը պետք է բացառել և փափուկ մազիկներով խոզանակից օգտվել: Կոշտ մազիկներով ատամի խոզանակ պետք է օգտագործել միայն բժշկի հետ խորհրդակցելուց հետո:

- Ատամի խոզանակը պետք է փոխել ամիսը մեկ անգամ:

- Միֆ. ատամի խոզանակը պետք է փոխել միջինում 2-3 ամիսը մեկ:

- Ատամի մածուկը բոլորի համար տարբեր է:

- Իրականություն. Ատամի մածուկը նույնպես ընտրում են՝ պայմանավորված ատամների և լնդերի վիճակով:

- Զգայուն ատամների համար կարելի է սովորական մածուկ օգտագործել:

- Միֆ. Եթե ատամները գերզգայուն են, չի կարելի այնպիսի ատամի մածուկ օգտագործել, որի մեջ հղկող նյութը շատ է: Այս դեպքում պետք է զգայուն ատամների համար հատուկ մածուկ օգտագործել: Լնդերի արյունահոսության և ցավի առկայության դեպքում հարկ է հակաբորբոքային մածուկներ օգտագործել:

- Եթե մեկ անգամ ատամնաքարերը հեռացվում են, ատամներն ավելի զգայուն են դառնում, և ավելի հաճախ մաքրելու անհրաժեշտություն է առաջանում:

Միֆ. առողջ ատամներ ու լնդեր ունենալու համար տարին 2 անգամ ատամնաքարերի մաքրումը պարտադիր է ցանկացած դեպքում:

Մարիամ Նալբանդյան