Պարզ երևում է, որ սա արվել է հասուն մարդու ձեռքով. Հրազդանում Քրիստոսի պատկերը պղծելու հետքերով
ՀԱՍԱՐԱԿՈՒԹՅՈՒՆ
Ֆեյսբուքյան օգտատեր Նարեկ Դեմիրճյանն իր էջում ահազանգել է, որ Կոտայքի մարզի Հրազդան քաղաքի, Ջրառատ թաղամասի Թուխ Մանուկ եկեղեցու բակում տեղադրված Հիսուս Քրիստոսի պատկերով խաչքարը ենթարկվել է վանդալիզմի:
«Ոմն անձը կամ անձիք կացնով կոտրել են արձանի դիմերեսը: Ցավով եմ պատկերացնում, որ մեր շրջապատում ապրում են նման մարդիկ, որոնց համար սրբապիղծ լինելը հավասար է ոսկե մեդալի: Հաղորդագրություն եմ ներկայացրել Հրազդանի Ոստիկանություն և ներկայացրել իրեղեն ապացույցներ: Հուսանք շուտով կգտնվի հանցագործը և կստանա իր պատիժը»,- ասված է գրառման մեջ:
«Անզեն աչքով է երևում, որ սա մտածված արարք է, իմ կարծիքով՝ երեխաները չէին կարող կոնկրետ դեմքի հատվածը կոտել: Պարզ երևում է, որ սա արվել է հասուն մարդու ձեռով, արձանը թղթից չէ, որ ձեռք տաս ու նման տեսք ստանա, որևէ բութ գործիքի հետքեր կան, չեմ ուզում նույնիսկ մտածել որ սա կարող է հայի ձեռքի գործ լինել, բայց որ այս ամենը դիտավորյալ արարք է, ես վստահ եմ»,- 1or.am-ի հետ զրույցում նշեց Նարեկը։
Հրազդանի համայնքապետարանից մեզ հայտնեցին, Հրազդանում սա նմանատիպ առաջին դեպքն է.
«Ես լսել եմ, որ Հայաստանի Հանրապետությունում կան վանդալիզմի նման դեպքեր: Գնահատական չեմ փորձի տալ, չգիտեմ՝ սա ինչ-որ աղանդի, թե հիվանդ, անհասկացող մարդու քայլ է, դա արդեն պատկան մարմինների գործն է: Հրազդանի համայնքապետարանը դատապարտում է այդ քայլը, քրիստոնյան չի կարող խաչքարի վրա ձեռք բարձրացնել»,- մեզ հետ զրույցում ասաց Հրազդան համայնքի ղեկավարի քարտուղար Արամայիս Պողոսյանը:
Հատկանշական է, որ Նարեկ Դեմիրճյանի գրառման մեկնաբանություններում օգտատերերն այլ տեղերում վանդալիզմի նմանատիպ օրինակների նկարներով մեկնաբանություններ են տեղադրել:
Մայր Աթոռի տեղեկատվական համակարգի տնօրեն Արժանապատիվ Տ. Եսայի քահանա Արթենյանի խոսքով՝ երևույթը միշտ էլ դատապարտելի է.
«Որևէ կոնկրետ բան չեմ կարող ասել, որովհետև չգիտենք՝ թե ով է այդ արարքի հեղինակը: Այս պարագայում կոնկրետ անուններ շահարկելն էլ ճիշտ չէ: Չեմ փորձի նաև ժամանակահատվածի և այսօրվա իրականության հետ կապել երևույթը, որովհետև նման ցավալի երևույթներ երբեմն-երբեմն մեզանում եղել են և կարծում եմ՝ սա պետք չէ այնպայման ինչ-որ բանի հետ կապել: Չեմ կարող բացառել, բայց չեմ էլ կարող հստակ կապ տեսնել այսօրվա ժամանակների հետ»:
Մարիամ Նալբանդյան
