Գլխուղեղի կաթվածի մասին հուշող հիմնական ախտանշանները, որոնք ոչ մի դեպքում չի կարելի անտեսել

Գլխուղեղի կաթվածը սրտանոթային համակարգի ամենավտանգավոր հիվանդություններից մեկն է, որը կարող է ախտորոշվել ինչպես տարեցների, այնպես էլ երիտասարդների մոտ։ Այս հիվանդությունը տարեկան հազարավոր մարդկանց կյանք է խլում, ուստի սրտանոթային համակարգի առողջությունը պահպանելը շատ կարևոր է։ Մասնագետները նախազգուշացնում են, որ գլխուղեղի կաթվածից խուսափելու համար հարկավոր է վարել առողջ կենսակերպ, պարբերաբար բուժզննում անցնել և չանտեսել անգամ անկարևոր թվացող կասկածելի փոփոխությունները։ 

Առողջական ցանկացած խնդրի դեպքում օրգանիզմը միշտ նախազգուշացնում է դրա մասին որոշակի ախտանշանների միջոցով, և գլխուղեղի կաթվածը նույնպես բացառություն չէ, ուստի բավական ուշադիր լինելու և անմիջապես միջոցներ ձեռնարկելու դեպքում կարելի է կանխել լուրջ բարդությունների զարգացումը։ Հարկ է հիշել, որ գլխուղեղի կաթվածը խանգարում է, որը կարող է հանգեցնել հաշմանդամության կամ մահվան, ուստի այս խնդրի վաղաժամ հայտնաբերումը շատ կարևոր է։

Կաթվածի ախտանշանները տարբերելու համար լուրջ բժշկական պատրաստություն անցնելու կարիք չկա։ Հետազոտությունները ցույց են տվել, որ գոյություն ունի 3 ախտանշան, որոնք ի հայտ են գալիս գլխուղեղի կաթվածի 89% դեպքերում, ուստի պարզապես հարկավոր է մտապահել դրանք և նկատելու դեպքում անհապաղ շտապօգնություն կանչել։ Այս հիվանդության մասին կարող են հուշել․

դեմքի իջեցումը (սովորաբար դեմքի միայն մի կողմի),
ձեռքի թուլությունը (ձեռքը թմրում է կամ ակամայից իջնում է),
խոսքի հետ կապված խնդիրները (ահասկանալի խոսք և բառերն արտաբերելու կամ դիմացինին հասկանալու հետ կապված խնդիրներ)։
Այս ախտանշաններից անգամ մեկի առկայության դեպքում հարկավոր է անհապաղ շտապօգնություն կանչել ու մտապահել դրանց ի հայտ գալու ժամը հնարավոր լուրջ հետևանքները կանխելու համար։ Կաթվածի նման դրսևորումներն իմանալը կարող է որոշիչ դեր խաղալ կաթվածից հետո օրգանիզմի վերականգնման և մահվան հավանականության նվազեցման գործում։ Բացի այդ, րոպեների ճշգրտությամբ ախտանշանների ի հայտ գալու ժամի վերաբերյալ տեղեկությունը կօգնի մասնագետներին շատ ավելի արագ գործել ու ճիշտ բուժօգնություն ցուցաբերել տուժածին, ինչը շատ կարևոր է նման լուրջ ախտաբանության դեպքում։

Հետազոտությունները ցույց են տվել, որ գլխուղեղի կաթվածի դեպքում որքան շուտ է սկսվում բուժումը tPA-ի միջոցով, այնքան բարձր է լիովին վերականգնվելու և բնականոն կյանքին անցնելու հավանականությունը, ուստի հարկավոր է շատ ուշադիր լինել։

Նյութի աբյուրը՝ medikforum.ru