Բայդենը հայտարարել է, որ պատրաստ է աջակցել Հայաստանի և Ադրբեջանի հաշտեցմանը
ՄԻՋԱԶԳԱՅԻՆ
ԱՄՆ նախագահ Ջոն Բայդենը հայտարարել է, որ Վաշինգտոնը պատրաստ է աջակցել Հայաստանի և Ադրբեջանի միջև հաշտեցման գործընթացին։ Ինչպես հայտնում է Sputnik Ադրբեջանը, այդ մասին ասվում է Ջո Բայդենի՝ Նովրուզի առթիվ Ադրբեջանի նախագահին ուղղված շնորհավորանքում։
«Որպես ԵԱՀԿ Մինսկի խմբի համանախագահ երկիր՝ մենք առաջվա պես հակված ենք Լեռնային Ղարաբաղի հակամարտության կայուն խաղաղ կարգավորմանը հասնելուն և Հայաստանի ու Ադրբեջանի միջև հաշտեցման գործընթացին աջակցելուն՝ հանուն բարգավաճ և խաղաղ ապագայի: Մենք նաև աջակցում ենք Կասպից ծովի տնտեսության դիվերսիֆիկացման և էներգետիկ հնարավորությունների զարգացման ուղղությամբ ձեր ջանքերին»,- գրել է նա։
Բայդենը նշել է, որ իր վարչակազմը կաշխատի Ադրբեջանի հետ՝ անվտանգության և տարածաշրջանային հաշտության ընդհանուր խնդիրների լուծման համար:
ԱՄՆ նախագահը նշել է, որ Միացյալ Նահանգները ցանկանում են ուսումնասիրել տնտեսական համագործակցության նոր հնարավորությունները։
2020թ. սեպտեմբերի 27-ին Ադրբեջանի զինված ուժերը լայնածավալ հարձակում սկսեցին Պաշտպանության բանակի դիրքերի վրա՝ արցախա-ադրբեջանական զորքերի շփման գծի ողջ երկայնքով։ Առաջնագծի մարտական գործողություններից բացի, ադրբեջանական բանակը զանգվածային հրթիռահրետակոծման էր ենթարկում Արցախի խաղաղ բնակավայրերը՝ առավելագույն վնաս պատճառելով բնակչությանը։ Հարվածների արդյունքում զոհեր են եղել քաղաքացիական բնակչության շրջանում, ավերվել են Լեռնային Ղարաբաղի բազմաթիվ բնակելի տներ և քաղաքացիական ենթակառուցվածքներ։
Ռազմական գործողությունները տևեցին 44 օր։ 2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
