Աշխարհում կորոնավիրուսով հիվանդացությունը մեկ շաբաթում աճել է 2 տոկոսով

Կորոնավիրուսով հիվանդացածների թիվը անցած շաբաթ 2 տոկոսով գերազանցել է նախորդ 7 օրվա տվյալները, իսկ մահվան դեպքերի թիվը 6 տոկոսով նվազել է: Այս տվյալները ներկայացվել են լույս չորեքշաբթի գիշերը Ժնեւում հրապարակված Առողջապահության համաշխարհային կազմակերպության ամենշաբաթյա համաճարակաբանական տեղեկագրում, փոխանցում է ՏԱՍՍ-ը: 

«Անցյալ շաբաթ տեղեկություններ են ստացվել վարակման ավելի քան 2,7 մլն նոր դեպքի մասին, ինչը 2 տոկոսով շատ է նախորդ շաբաթվա համեմատությամբ»,- նշում են կազմակերպությունից: «Գլոբալ մասշտաբով երկրների շուրջ կեսում նոր դեպքերի թիվը նվազել է, մինչդեռ մյուս կեսում աճ է նկատվում»,- արձանագրել են ԱՀԿ-ից: Համաճարակաբանական տեղեկագրի համաձայն՝ մարտի 1-7-ը աշխարհում գրանցվել է 2 734 381 վարակված եւ 60 323 մահ: Մարտի 7-ի դրությամբ՝ կար վարակման 116 166 652 եւ պացիենտների մահվան 2 582 528 դեպք:

Անցած շաբաթ հիվանդացության աճը հատկապես նկատելի է եղել Աֆրիկայում (10 տոկոսով) եւ Միջերկրական ծովի արեւելյան հատվածում (10 տոկոսով), ինչպես նաեւ Եվրոպայում (4 տոկոսով): Մահացությունն աճել է Միջերկրական ծովի արեւելյան հատվածում (9 տոկոսով), միաժամանակ կրճատվել է մյուս բոլոր տարածաշրջաններում:

Հյուսիսային եւ Հարավային Ամերիկաներում 7 օրում վարակվել է ավելի քան 1,1 մլն եւ մահացել է ավելի քան 32 հազար մարդ: Եվրոպայում գրանցվել է վարակման ավելի քան 1,1 մլն նոր դեպք եւ ավելի քան 20 հազար մահ: Բժիշկները Միջերկրական ծովի արեւելյան հատվածում հայտնաբերել են ավելի քան 228 հազար վարակվածի, մահացել է ավելի քան 2,7 հազար մարդ:

ԱՄՆ-ում մեկ շաբաթում վարակվածների թիվն աճել է ավելի քան 427 հազարով: Հաջորդում են Բրազիլիան (ավելի քան 413 հազար նոր դեպք), Ֆրանսիան (ավելի քան 143 հազար), Իտալիան (ավելի քան 138 հազար), Հնդկաստանը (ավելի քան 115 հազար), Լեհաստանը (ավելի քան 87 հազար), Չեխիան (ավելի քան 85 հազար), Ռուսաստանը (ավելի քան 76 հազար), Թուրքիան (ավելի քան 76 հազար), Իրանը (ավելի քան 58 հազար):