Նյարդաբանը նշել է՝ ինչպես հաղթահարել աշնանային մելամաղձությունը
ՀԱՍԱՐԱԿՈՒԹՅՈՒՆ
Մոսկվայի շրջանի առողջապահության նախարարության արտահաստիքային գլխավոր նյարդաբան Ռինատ Բոգդանովը գտնում է, որ սկանդինավյան քայլքը, որը ներառում է կարդիոմարզանքի, աշխատանքի և հանգստի տարրերը, ինչպես նաև ճիշտ սննդակարգը, կարող է հաղթահարել աշնանային մելամաղձությունը: Այս մասին հաղորդել է РИА Новости-ն:
«Աշնանային մելամաղձությունը հաղթահարելու համար մարդն իր օրգանիզմում պետք է սթրեսակայունության պաշար ձևավորի:
- Առաջինը և ամենակարևորը աշխատանքի ու հանգստի ռեժիմն է, քունը պետք է բավարար լինի:
- Երկրորդ կետը՝ մտավոր գործունեության հետ մեկտեղ՝ անհրաժեշտ է պարբերական ֆիզիկական ակտիվություն: Հիմնականում դրանք դինամիկ տարբերակներն են, այսպես կոչված՝ կարդիոմարզանքները, որոնց մասին շատերը լսել են, պարզ ասած՝ այն, ինչը մարզում է սրտանոթային համակարգը և աշխատեցնում մկանները՝ ցիկլային ակտիվությունը: Այժմ ամենաբարենպաստ տարբերակը փայտերով սկանդինավյան քայլքն է:
- Երրորդ կետը՝ ֆիզիկական ակտիվությունից հետո մեզ ադեկվատ սնունդ է պետք: Հիմա սեզոնը դեռ թույլ է տալիս ձմռանը պատրաստվելու համար վիտամինների պաշարներով լի բանջարեղեն և մրգեր օգտագործել: Գումարենք ևս մեկ շատ կարևոր հանգամանք՝ արևը, քանի որ այն արտահայտված հակադեպրեսիվ ազդեցություն ունի: Այժմ, քանի դեռ հնարավորություն կա, առաջարկում եմ՝ ավելի շատ լինել արևի տակ», - ասել է նյարդաբանը:
Նրա կարծիքով, արևոտ եղանակին զբոսայգում սկանդինավյան քայլքի համակցությունը հավասարակշռված քանակով ճարպեր, սպիտակուցներ և ածխաջրեր ներառող առողջ սննդի, ինչպես նաև աշխատանքի և հանգստի ռեժիմի հետ, մարդուն թույլ է տալիս սթրեսակայունության պաշար ձևավորել և պատրաստվել ձմեռային սեզոնին:
Նյութը հրապարակման պատրաստեց Լիլիթ Ամիրաղյանը
