Օլիգարխների փողերը՝ դեպի բանակ. երթով դեպի նախագահական առանձնատուն, շրջափակում

Նախորդ շաբաթվա վերջին Բաղրամյան 26-ի մատույցներում «ռազմական օպերացիայի» վերածված երթի հեղինակ «Մենք ենք տերը մեր երկրի» նախաձեռնությունը նոր ակցիա է նախապատրաստում. մայիսի 13-ին նախատեսվում է երթ դեպի Պռոշյան փողոցի վրա գտնվող Նախագահական առանձնատուն: Խմբի ֆեյսբուքյան էջից տեղեկանում ենք, որ երթը մեկնարկելու է ժամը 18:00-ին՝ Բաղրամյան – Պռոշյան փողոցների խաչմերուկից:

Այսօր մեզ չհաջողվեց խոսել երթի նախաձեռնող խմբի անդամներից որեւէ մեկի հետ. հավանաբար անվտանգության նկատառումներից ելնելով նախաձեռնողները որոշել են գաղտնի մնալ: Խմբի անդամներից որեւէ մեկի հետ հեռախոսով զրուցելու մեր բոլոր փորձերը ապարդյուն անցան, իսկ ֆեյսբուքյան էջի միջոցով ուղղած հարցմանը այսպիսի պատասխան ստացանք. «Մենք միայն հայտարարություններով ենք հանդես գալու, որեւէ մեկը իրավասու չէ մամլո ասուլիս տալ մեր անունից»:

Ֆեյսբուքյան էջում տեղադրված հաղորդագրությունում նշվում է, որ երթի մասնակիցները, հասնելով առանձնատուն՝ փորձելու են շրջափակել այն.

«Ձգտելու ենք այնտեղ մնալ եւ շրջափակված պահել նստավայրը այնքան ժամանակ, քանի դեռ չեն կատարվել մեր պահանջները՝ դրանով մեր քաղաքացիական անհնազանդությունն արտահայտելով Նախագահի ինստիտուտի անգործության վերաբերյալ»:

Խումբն իր ֆեյսբուքյան էջում նաեւ բացատրում է, թե ինչպես է հնարավոր հասնել հաղթանակի՝ նախանշված պահանջների կատարման տեսքով. «Յուրաքանչյուրս ամեն օր պետք է կատարի որոշակի քայլ, որ մայիսի 13-ին բոլորս հաղթանակ տոնենք: Դա նախեւառաջ ենթադրում է ինքնակազմակերպվել, ստեղծել 5-10 հոգանոց խմբեր՝ թե Երեւանում, թե մարզերում, ֆիզիկապես մարզվել, սկսել հասկանալ թիմակիցներին կես խոսքից, շարժումից ու հայացքից: Այդ խմբերը մեր շարժման ողնաշարն են: Մեր ակցիաները բացառապես խաղաղ բնույթ են կրում, սակայն քաղաքացիական անհնազանդությունը ենթադրում է անզեն ու խաղաղ դիմադրություն իշխանություններին: Մենք ունենք որոշակի արդարացի պահանջներ, իշխանությունների անգործությանը մենք պատասխանելու ենք անհնազանդությամբ: Փողոց փակել, իհարկե հնարավոր է, բայց այն փակած պահելը մի քանի օր պահանջում է որոշակի փոխգործակցություն բոլոր խմբերի միջեւ ու կարգապահություն: Այդ իսկ պատճառով մենք ձգտում ենք, որ խմբերը լինեն ինքուրույն, սակայն չշեղվեն մեր հայտարարած ռազմավարությունից: Մենք բոլորս այս շարժման մասնիկն ենք:
Մենք պետք է ամեն կերպ դիմադրենք ոստիկանների անօրինական քայլերին ու մեզ բերման ենթարկելու փորձերին՝ առանց նրանց նկատմամբ բռնություն գործադրելու: Դա անշուշտ հնարավոր է, երբ ամեն մեկին մեկ այլ մասնակից պահում է, երբ բոլորս թեւ թեւի ենք մտած, երբ շրջափակում ենք բերման ենթարկելու համար նախատեսված մեքենաները եւ այլն: Որևէ դեպքում չհարվածեք ոստիկաններին ու նրանց հետ մի բռնվեք խոսակցության: Խմբերը պետք է շատ ճկուն լինեն: Մենք պետք է ապացուցենք այս իշխանություններին, որ նրանք ունեն մի ճանապարհ՝ կատարել մեր պահանջները»:
Նշենք, որ խմբի պահանջները նույնն են, ինչ դեպի Բաղրամյան 26 երթի ժամանակ՝ ձեռնպահ մնալ Արցախի հարցի կարգավորման որեւէ փաստաթուղթ ստորագրելուց, պահպահել ստատուս քվոն, բացառել տարածքային որեւէ զիջում եւ խաղաղապահների մուտք Արցախ կամ հարակից տարածքներ:

Եվ մինչ պահպանվում է ստուտուս քվոն Արցախում՝ խումբը Սերժ Սարգսյանից պահանջում է պետբյուջեից անհապաղ ֆինանսական աջակցություն ցուցաբերել զոհված զինվորների ընտանիքներին, աշխատանքից ազատել արտգործնախարար Էդվարդ Նալբանդյանին, Պաշտպանության նախարար Սեյրան Օհանյանին, ԶՈՒ Գլխավոր Շտաբի պետ Յուրի Խաչատուրովին եւ ԶՈՒ ԳՇ պետի տեղակալ Հայկազ Բաղմանյանին իրենց անգործության եւ իրավիճակին չտիրապետելու պատճառով, ինչը հանգեցրել է մարդկային զոհերի: Պահանջվում է նաեւ շուրջ 50 օլիգարխների (այդ թվում՝ Սաշիկ Սարգսյան, Միքայել Մինասյան, Հովիկ Աբրահամյան, Գագիկ Խաչատրյան, Գագիկ Ծառուկյան, Ռուբեն Հայրապետյան, Գագիկ Բեգլարյան եւ ուրիշներ) պարտավորեցնել պետբյուջե վճարել առնվազն 5 մլն ԱՄՆ դոլարի չափով գումար: Այս գումարներն, ըստ «մենք ենք տերը մեր երկրի» նախաձեռնության՝ ուղղվելու են Հայաստանում բարձր տեխնոլոգիաների կիրառմամբ պաշտպանական համակարգեր մշակելուն:

Հիշեցնենք, որ ապրիլի 23-ին դեպի Բաղրամյան 26 երթի ընթացքում բախումներ տեղի ունեցան ոստիկանների եւ ակցիայի մասնակիցների միջեւ: Հատուկ օպերացիայի արդյունքում բերման ենթարկվեցին ոչ միայն ցուցարարներ, այլ նաեւ օպերատորներ եւ լրագրողներ: Ընդհանուր առմամբ բերման ենթարկվեց 42 քաղաքացի: Իսկ բախումների պատճառն այն էր, որ «Մենք ենք տերը մեր երկրի» նախաձեռնությունը երթ էր նախատեսել դեպի Բաղրամյան 26: