Լոնդոնի գիտության թանգարանում Գագարինի կիսանդրին է բացվել (լուսանկար)
ՖՈՏՈ
Լոնդոնի գիտության թանգարանի տնօրեն Իան Բլետչֆորդը հանդիսավորությամբ բացել է առաջին տիեզերագնաց Յուրի Գագարինի կիսանդրին և խոստացել պարբերաբար տիեզերքի՝ ռուսական կողմի հետազոտություններին նվիրված ցուցահանդեսներ անցկացնել: Այս մասին հայտնում է РИА Новости-ն:
«Սա իմ գաղափարն էր՝ մեր թանգարանում Գագարինի կիսանդրին տեղադրել: Ինձ համար կարևոր է, որպեսզի մեր հավաքածուն այստեղ՝ թանգարանում, պատմի տիեզերքի ուսումնասիրության ամբողջ պատմությունը, այնինչ երբ Եվրոպայի և ԱՄՆ-ի թանգարանների մեծամասնությունում ներկայացվում են ամերիկյան տեխնոլոգիաները», - ասել է թանգարանի տնօրենը:
Բլետչֆորդի խոսքով՝ թանգարանում առկա է նաև Վալենտինա Տերեշկովային նվիրված ցուցադրություն:
«Մենք ցանկանում ենք անընդհատ հիշեցնել մարդկանց, որ ռուսական ձեռքբերումները, մանավանդ՝ 1950-1960 թվականների, տիեզերքի ժամանակակից հետազոտությունների հիմք են դարձել», - պատմել է Բլեչֆորդը՝ մեկնաբանելով Գագարինի կիսանդրին տեղադրելու գաղափարի ծագումը:
Նրա կարծիքով՝ չի կարելի հույսը դնել միայն պատմական հիշողության վրա:
«Իհարկե, իմ ծնողների տարիքի մարդիկ հիշում են Գագարինին, սակայն մենք պետք է կրկին ու կրկին հիշեցնենք երիտասարդներին: Ահա թե ինչու մեզ մոտ անցկացվում է Տերեշկովայի մասին ցուցադրություն: Մենք դպրոցականների հսկայական աուդիտորիա ունենք. նրանք գալիս և ֆիլմեր են դիտում Տերեշկովայի կյանքի մասին և իրենց համար բացահայտում այս մեծ մարդկանց: Լինի դա Գագարինը, Լեոնովը, Տերեշկովան թե Կորոլյովը՝ նրանք բոլորը մեծ պատմական դեմքեր են», - ընդգծել է Բլետչֆորդը:
