Փորձագետը գնահատել է Հայաստանի և Ադրբեջանի միջև անկլավների շուրջ վեճը

ՀՀ վարչապետ Նիկոլ Փաշինյանը գործում է Ադրբեջանի, Թուրքիայի և իրենց աջակցող Արևմուտքի շահերից ելնելով։ Այդ մասին iz.ru-ին տված հարցազրույցում հայտարարել է նախկին ընդդիմադիր պատգամավոր Արման Աբովյանը։

«Բաքուն և Անկարան ցանկանում են մեր երկիրը ենթարկեցնել իրենց կամքին, ստեղծել մի տեսակ Արևմտյան Ադրբեջան Հայաստանի փոխարեն։ Տիգրանաշենը կարևոր նշանակություն ունի. եթե Բաքուն վերահսկողություն ստանձնի այդ կետի նկատմամբ, կկարողանա կիսել Հայաստանը երկու մասի։ Ինչո՞ւ է այս հարցը ծագել հիմա։ Իշխող կուսակցությունը հաջողությամբ հաղթահարել է հունիսին կայացած խորհրդարանական ընտրությունները և կարողացել պահպանել իշխանությունը։ Հիմա նրանք կարծում են, որ ունեն ցանկացած որոշում կայացնելու մանդատ», - բացատրել է նա։

Ավելի վաղ Փաշինյանը հայտարարել էր, որ Հայաստանից Իրան տանող ճանապարհին գտնվող Տիգրանաշեն գյուղը երկրի տարածքի մաս չի կազմում։ Նրա խոսքով Երևանն ու Բաքուն համաձայնել են սահմանազատում անցկացնել 1991 թվականի Ալմա-Աթայի հռչակագրի հիման վրա, ըստ որի ԽՍՀՄ փլուզման ժամանակ նախկին խորհրդային հանրապետությունների վարչական սահմանները ճանաչվել են որպես միջպետական։

«Ըստ դրանց Արծվաշենը հայկական տարածք է, մինչդեռ Քյարքին (Տիգրանաշեն), Բարխուդարլուն և Յուխարի-Ասկիպարան ոչ։ Սակայն կան այլ տարածքներ, որտեղ քարտեզները չեն համապատասխանում իրականությանը, օրինակ Ջերմուկում, Վայոց ձորի այլ շրջաններում, ինչպես նաև Տավուշում։ Հարցը պետք է լուծվի, բայց առանց ռազմական տարբերակի», - ասել է Փաշինյանը։

Հուլիսի 9-ին Հայաստանի վարչապետը հայտարարել էր, որ երկրի իշխանությունները չեն կարող հրաժարվել քննարկել նախկին Ադրբեջանական ԽՍՀ անկլավները, այդ թվում Արծվաշեն գյուղը, որը Հայաստանի ինքնիշխան տարածք է, բայց ներկայումս վերահսկվում է Ադրբեջանի կողմից։ Նա առաջարկել էր հարցի լուծման երկու տարբերակ. պահպանել տարածքը դե յուրե սեփականատիրոջ հետ կամ փոխանակել հավասար տարածքներ։

Նյութը հրապարակման պատրաստեց Կամո Խաչիկյանը

www.1or.am