Դաշտանային ցիկլի փուլերն ու կանանց սննդակարգը. ինչպես ավելի արդյունավետ կերպով վերահսկել քաշը

Մարդու էներգիան ու ախորժակը գտնվում են հորմոնների վերահսկողության տակ, սակայն հորմոնալ բալանսը կարող է խախտվել քնի պակասի, սթրեսի և շատ այլ գործոնների հետևանքով:Կանանց օրգանիզմում սեռական հորմոնների մակարդակը մշտապես տատանվում ՝ կախված դաշտանային ցիկլից, ուստի նիհարել ցանկացողները պետք է նաև հաշվի առնեն այս փաստը: Օրինակ՝ լյուտեինային փուլում օգտագործվող ու վատնվող էներգիայի քանակը, որպես կանոն, մեծանում է, ուստի կանայք ավելի շատ բարձր կալորիականությամբ սննդի կարիք են ունենում:

Դաշտանային ցիկլը և սննդակարգը. Գեյկերի և Կիլի ուսումնասիրությունը

Ուսումնասիրության ընթացքում գիտնականներն ավելորդ քաշով տառապող մոտ 60 կնոջ բաժանել են երկու խմբի, որոնք կես տարի շարունակ հետևել են հատուկ դիետայի (օրական օգտագործում էին մոտ 1600 կկալ): Սակայն խմբերից մեկի համար գիտնականները դիետան մշակել են՝ կանանց դաշտանային ցիկլերի փուլերին համապատասխան:

Բժիշկ Նինա Գեյկերի խոսքով՝ նրանք ավելացրել են օգտագործվող սպիտակուցների քանակությունը դաշտանային ցիկլի այն փուլերում, որոնց ժամանակ հաճախ առաջանում է քաղցի զգացողություն, իսկ այն փուլերի ընթացքում, որոնց ժամանակ կանանց մոտ առաջանում է ճարպոտ ու ածխաջրերով հարուստ սննդամթերք օգտագործելու ցանկություն, նրանք թույլ են տվել կամավորներին մի կտոր սև շոկոլադ ուտել:

Ուսումնասիրությունները ցույց են տվել, որ այն խմբի կանայք, որոնց դիետան կարգավորվել է իրենց դաշտանային ցիկլին համապատասխան, միջինում 4 կգ ավել ավելորդ քաշ են կորցրել, քան մյուները:

Գիտնականների խոսքով՝ ուսումնասիրությունները դեռ պետք է շարունակվեն, սակայն էլ ավելի լավ արդյունքի հասնելու համար հարկավոր է դաշտանային ցիկլի տարբեր փուլերում ուշադրություն դարձնել ֆիզիկական ծանրաբեռնվածությանն ու սննդակարգին:

Դաշտանային ցիկլի փուլերը, սննդակարգը և վարժություններ՝ քաշը վերահսկողության տակ պահելու համար

Վաղ ֆոլիկուլային փուլ (1-4-րդ օրեր).  Գեյկերի պնդմամբ՝ այս փուլում կանանց օրգանիզմում էնեգիայի մակարդակն ամենից ցածրն է լինում, ուստի խորհուրդ է տրվում նախապատվությունը տալ հեշտ ու պարզ վարժություններին (յոգա, զբոսանք և այլն): Որպես կանոն՝ այս ժամանակահատվածում հագենալու համար ավելի քիչ սնունդ է հարկավոր:

Ուշ ֆելիկուլային փուլ (5-15-րդ  օրեր). այս ժամանակահատվածում նախընտրելի է մարզումները դարձնել ավելի ինտենսիվ ու հաճախակի, իսկ քաղցի զգացման ուժեղացման հետ մեկտեղ սննդակարգ հարստացնել սպիտակուցներ պարունակող մթերքով:

Լյուտեինային փուլ (16-28-րդ  օրեր).  դաշտանային ցիկլի այս փուլում սննդակարգը, որպես կանոն, դառնում է ավելի բարձր կալորիականությամբ, սակայն այդ կալորիաները կարելի է վատնել ինտենսիվ մարզումների միջոցով: Այս ընթացքում ցանկացած ֆիզիկական ակտիվություն շատ ավելի հեշտ կտրվի, ուստի պետք չէ բաց թողնել այդ հնարավորությունը: Հարկավոր է օգտագործել առողջարար ճարպեր (ավոկադո, ձիթայուղ, ընկույզներ) ու սպիտակուցներ և խուսափել ածխաջրերով հարուստ մթերքից: Ցիկլի վերջին օրերին կարելի է օգտագործել մի փոքր սև շոկոլադ՝ քաղցր ուտելու ցանկությունը բավարարելու համար:

Այկ կերպ ասած՝ վերոնշյալ ուսումնասիրությունը ևս մեկ անգամ ապացուցում է, որ անհրաժեշտ է ուշադիր լինել օրգանիզմի հանդեպ: Դաշտանային ցիկլի որոշ օրերին սովորականից մեծ ախորժակ ունենալու դեպքում անհրաժեշտ է օգտագործել առողջ սնունդ, իսկ այդ սննդի միջոցով ստացած ավելորդ էներգիան վատնել ավելի ինտենսիվ ֆիզիկական վարժությունների միջոցով:

Բացի այդ, հարկավոր է նաև հաշվի առնել այն փաստը, որ կանոնակարգված դաշտանային ցիկլի դեպքում կանանց համար շատ ավելի հեշտ է լինում էներգիան ու ախորժակը վերահսկել, ուստի սննդակարգն ու մարզումների պլանը կազմելը նույնպես շատ ավելի հեշտ կլինի:


Նյութի աղբյուրը՝ med.tert.am