ՄԱԳԱՏԷ-ն գնահատել է Հայկական ԱԷԿ-ի (ՀԱԷԿ) պատրաստվածությունը երկրորդ էներգաբլոկի շահագործումը երկարաձգելու համար

Ավարտվել է ՄԱԳԱՏԷ-ի տասնօրյա առաքելությունը, որը գնահատում էր Հայկական ԱԷԿ-ի (ՀԱԷԿ) պատրաստվածությունը  երկրորդ էներգաբլոկի անվտանգ երկարաժամկետ շահագործման համար, գրում է news.un.org–ը։ 1970-ականներին կառուցված և երկու էներգաբլոկներից բաղկացած ՀԱԷԿ-ը գտնվում է Երևանից 26 կիլոմետր հեռավորության վրա։

Առաքելությունը հաջորդել է 2018 և 2021 թվականներին անցկացված ստուգումներին։ ՀԱԷԿ-ի երկրորդ էներգաբլոկը՝ ճնշման տակ աշխատող ջրային ռեակտորը, շահագործման է հանձնվել 1980 թվականին։ Առաջին էներգաբլոկի աշխատանքը դադարեցվել է 1989 թվականին՝ Հայաստանի հյուսիսում տեղի ունեցած երկրաշարժից հետո։ 2021 թվականին Հայաստանի միջուկային կարգավորման մարմինը երկարաձգեց 2-րդ բլոկի շահագործման ժամկետը մինչև 2026 թվականի սեպտեմբեր։ Ներկայումս կայանը թույլտվություն է խնդրում իր գործունեությունը ևս տասը տարով՝ մինչև 2036 թվականը, երկարաձգելու համար։ Առաքելության մեջ ներառված էին ՄԱԳԱՏԷ-ի աշխատակիցներ, մասնագետներ Արգենտինայից, Նիդեռլանդներից, Ռումինիայից, Ուկրաինայից, Միացյալ Թագավորությունից և ԱՄՆ-ից, ինչպես նաև դիտորդներ Հունգարիայից և Ատոմային օպերատորների համաշխարհային ասոցիացիայից (WANO): Մասնագետները մի քանի անգամ շրջայցեր են կատարել տեղում և խորհրդակցություններ են անցկացրել անձնակազմի հետ։

Ըստ առաքելության ղեկավար, ՄԱԳԱՏԷ-ի պաշտոնյա Բրայս Լեմանի «կայանը հստակ առաջընթաց է գրանցել նախորդ առաքելությունների ընթացքում դիտարկածի համեմատ և զգալի առաջընթաց է գրանցել նախկինում հայտնաբերված թերությունները վերացնելու գործում»։ Նա նշել է, որ ծերացման կառավարման և շահագործման ժամկետի երկարաձգման բազմաթիվ միջոցառումները համապատասխանում են ՄԱԳԱՏԷ-ի անվտանգության չափանիշներին։ «Կայանը հստակ առաջընթաց է գրանցել նախորդ առաքելություններից ի վեր», - ասել է Բրայս Լեմանը նշելով, որ կայանի կառավարման բազմաթիվ միջոցառումներ համապատասխանում են ՄԱԳԱՏԷ-ի անվտանգության չափանիշներին։ Նա կոչ է արել ՀԱԷԿ-ի ղեկավարությանը շարունակել «մնացած միջոցառումների» իրականացումը և «հաշվի առնել ստուգման արդյունքները»։ Խումբը նշել է ՀԱԷԿ-ի հաջողությունները, որոնք կարող են տարածվել ամբողջ համաշխարհային միջուկային արդյունաբերության վրա, և առաջարկություններ ներկայացրել անվտանգության հետագա բարելավման համար։

Ատոմակայանի գլխավոր ինժեներ Արթուր Գրիգորյանը ընդգծել է առաքելության կարևորությունը. «ՄԱԳԱՏԷ-ի թիմի փորձը և գիտելիքները կօգնեն մեզ բացահայտել բարելավման կարիք ունեցող ոլորտները»։ Նա նաև նշել է, որ ստուգումը կօգնի «մեր գործունեությունը ավելի մոտեցնել միջազգային անվտանգության չափանիշներին»։

Նյութը հրապարակման պատրաստեց՝ Կամո Խաչիկյանը

www.1or.am