Կալանավորներ և բանտապահներ են սպանվել. խռովություն՝ գաղութում

Փետրվարի 3-ին՝ կեսօրին, Դուշանբեից 24 կմ հեռավորության վրա գտնվող Վահդաթ քաղաքի բանտում մի խումբ կալանավորներ, որոնք ԴԱԻՇ ահաբեկչական կազմակերպության կողմնակիցներ են, փորձել են պատանդ վերցնել, ապա փախչել։

«Ազատություն» ռադիոկայանի տաջիկական ծառայությունը գրում է, որ այս մասին հաղորդվում է Տաջիկստանի արդարադատության նախարարության քրեական պատիժների կատարման գլխավոր վարչության պաշտոնական հաղորդագրության մեջ։

«Ինը հոգանոց բանտարկյալների խումբը, օգտագործելով ինքնաշեն գործիքներ. մահացու հարձակում է գործել ուղղիչ հիմնարկի պատասխանատու աշխատակիցների վրա»,- ասվում է հաղորդագրության մեջ։

Նշվում է, որ կալանավորները չեն ենթարկվել հիմնարկի վարչակազմի օրինական պահանջներին, օգտագործելով ինքնաշեն սուր և կտրող երկաթե դանակներ, շարունակել են իրենց հանցավոր գործողությունները՝ առանց բողոքների և պայմանների ներկայացման, փորձել են սպանել հաստատությունը հսկող զինվորներին և փախչել:

Պաշտոնական տեղեկատվության համաձայն՝ հարձակման հետևանքով կալանավայրի երեք աշխատակիցներ ստացել են ծանր մարմնական վնասվածքներ, երեք բանտարկյալներ սպանվել են իշխանությունների պատասխան գործողությունների արդյունքում, իսկ մնացածը կալանավորվել են։ 

Միևնույն ժամանակ, Reuters գործակալությունը, հղում անելով Տաջիկստանի անվտանգության գործակալությունների աղբյուրին, գրում է գաղութում անկարգությունները ճնշելու ժամանակ սպանված հինգ բանտարկյալների մասին:
«Ազատություն» ռադիոկայանը նշում է, որ ապստամբ բանտարկյալներին վնասազերծելու համար օգտագործվել են հատուկ ջոկատայիններ։ «Հաստատության անվտանգության և պաշտպանության համակարգը լիովին վերականգնվել է», - ասվում է ՔՊԿԳՎ հաղորդագրության մեջ։