Մառախուղ չի եղել, բարենպաստ եղանակ էր. Իրանի նախագահի աշխատակազմը նոր մանրամասներ է հայտնել ուղղաթիռի կործանումից

Իրանի նախագահի աշխատակազմի ղեկավար Ղոլամ-հոսեյն Էսմայիլին, ով Էբրահիմ Ռաիսիին ուղեկցել է մեկ այլ ուղղաթիռով, ասել է, որ օդանավի կործանման պահին եղանակը բարենպաստ է եղել, իսկ կործանված ուղղաթիռի ուղեւորներից մեկը մի քանի ժամ ողջ է եղել։

նրա խոսքերը մեջբերել է IRNA լրատվական գործակալությունը։

«Միգուցե կիրճի խորքում մառախուղ կար, բայց մեր թռիչքի հետագծով մառախուղ չկար, ամպերը մի փոքր ավելի բարձր էին, քան ուղղաթիռը», - ասել է Էսմայիլին:

Պաշտոնյայի խոսքով՝ ուղղաթիռի անձնակազմը, որով նա թռչում էր, նկատել է նախագահական ինքնաթիռի անհետացումը մոտ 30 վայրկյան անց այն բանից հետո, երբ օդաչուն անձնակազմի մնացած անդամներին հրամայել է բարձրանալ ամպերից վեր։ Ռաիսիի ուղղաթիռի անհետացումից հետո երկրորդ օդանավի անձնակազմը որոնել է նրան և փորձել կապ հաստատել նրա հետ։

Արդյունքում օդաչուներին հաջողվել է կապ հաստատել Թավրիզ քաղաքի իմամ Սայեդ Մոհամմադ Ալի Ալ-Հաշեմին, ով ինքնաթիռում եղել է Ռաիսիի հետ։ Էսմայիլին ասել է, որ անձնակազմը կապի մեջ է եղել նրա հետ մահից մի քանի ժամ առաջ: Նրա խոսքերից պարզ է դարձել, որ կործանվել է նախագահական ուղղաթիռը։

«Ես ինձ լավ չեմ զգում, չգիտեմ ինչ է եղել, չգիտեմ որտեղ եմ, ծառերի տակ եմ, չգիտեմ, ոչ մեկին չեմ տեսնում, մենակ եմ»,-ասել է իմամը, ւսը պաշտոնյայի: 

Ռաիսիին, արտաքին գործերի նախարար Հոսեյն Ամիր Աբդոլլահյանին և այլ պաշտոնյաների տեղափոխող ուղղաթիռը կործանվել է մայիսի 19-ին երկրի հյուսիս-արևմուտքում՝ Վերզեգանի շրջանում։

Մայիսի 20-ի առավոտյան Իրանի փոխնախագահ Մոհսեն Մանսուրին հաստատել է տեղեկություններն այն մասին, որ նախագահը և նրա պատվիրակությունը զոհվել են ուղղաթիռի վթարի հետևանքով։

Պատվիրակությունը վերադառնում էր Ադրբեջան կատարած այցից հետո, որտեղ Ռաիսին և նրա ադրբեջանցի գործընկեր Իլհամ Ալիևը մասնակցեցին Գիզ Գալասի հիդրոէլեկտրակայանի բացման արարողությանը և սահմանային Արաքս գետի վրա Խուդաֆերին հիդրոէլեկտրակայանի շահագործման հանձնմանը։