Սեւ գրություններ երեխաների դիակների վրա. ինչպես են Գազայում զոհվում երեխաները

Երեք երեխաների մարմիններ գտնվում են մի շինության ներսում, որը նման է հիվանդանոցի դիահերձարանի Գազայի հատվածում, երեխաներից մեկի մաշկին սեւ թանաքով գրություն կա։

«Արդեն մի քանի դեպք է, երբ ծնողները գրում են իրենց երեխաների անունները նրանց ոտքերին եւ փորին»,- CNN-ին պատմել է դոկտոր Աբդուլ Ռահման Ալ Մասրին, որը ղեկավարում է Ալ-Աքսայի Տառապյալների հիվանդանոցի շտապօգնության բաժանմունքը։

Ծնողներն անհանգստանում են, որ «ինչ ասես կարող է պատահել», եւ ոչ ոք չի կարողանա ճանաչել իրենց երեխաներին։ «Նրանք զգում են, որ ցանկացած պահի կարող են դառնալ զոհ եւ վիրավորվել կամ սպանվել»,- ավելացրել է Ալ Մասրին։ Սեւ գրությունները վախի եւ հուսահատության նշան են, որոնք զգում են ծնողները խիտ բնակեցված անկլավում, մինչ Իսրայելը շարունակում է հարվածել նրանց՝ ի պատասխան ՀԱՄԱՍ-ի հոկտեմբերի 7-ի հարձակման։

Հիվանդանոցի աշխատակիցը կիրակին անվանել է «բացառիկ  օր»։ Հրաժարվելով նշել իր անունը՝ նա CNN-ին տեղեկացրել է, որ շաբաթ լույս կիրակի գիշերը զոհերի թիվը գերազանցել է 200-ը։

«Մենք նկատել ենք, որ շատ ծնողներ իրենց երեխաների անունները գրում են նրանց ոտքերին, որպեսզի  կարելի լինի նրանց նույնականացնել ավիահարվածներից հետո։ Շատ երեխաներ համարվում են անհետ կորած, շատերը հայտնվում են այստեղ կոտրված գանգերով... եւ նրանց ճանաչելն անհնար է, միայն այդ գրերով են ճանաչում»։

Վերջին երկու շաբաթում հարյուրավոր երեխաներ են հանվել շենքերի փլատակների տակից։

Մինչդեռ հիվանդանոցներում սպառվում են դեղերը, ջուրը եւ էլեկտրականությունը, իսկ հարյուրավոր վիրավոր պաղեստինցիներ շարունակում են դիմել բուժօգնություն ստանալու համար, CNN-ին տեղեկացրել են Գազայի հատվածի բժիշկներն ու բուժաշխատողները։

Ավելի քան 300 մարդ օգնության համար դիմել է Ալ-Աքսայի տառապյալների հիվանդանոց Դեյր-էլ-Բալահում, Գազայում, այն բանից հետո, երբ Իսրայելը ռումբեր է նետել ոչ հեռվում շաբաթ լույս կիրակի գիշերը, տեղեկացրել է դոկտոր Իյադ Իսա Աբու Զահերը, հիվանդանոցի գլխավոր տնօրենը։ «Ոչ մի հիվանդանոց աշխարհում չի կարող ընդունել այսքան վիրավորների։ Չկան ոչ հիվանդասենյակներ, ոչ մահճակալներ։ Վիրավորները պառկած են վիրահատարանների դռների մոտ, միմյանց վրա, ամեն մեկն սպասում է վիրահատության իր հերթին»,- նշել է նա։

Պաղեստինի առողջապահության նախարարության տվյալներով՝ զոհերի թիվը Գազայի հատվածում հոկտեմբերի 7-ից հետո հասել է 4 650 մարդու, ավելի քան 14 245 վիրավոր կա։

Հիվանդանոցները հսկայական խնդիրներ ունեն, քանի որ ռմբակոծությունները շարունակվում են, իսկ գեներատորների վառելիքը սպառվում է։

Առաջին օգնության բեռնատարները Գազա են մտել հանգստյան օրերին Եգիպտոսից, բայց դա շատ քիչ է։

Դոկտոր Ֆուադ ալ-Բյուլբյուլը, որը Ալ-Շիֆա հիվանդանոցի նեոնատալ բաժանմունքի վարիչն է, նախազգուշացրել է, որ նորածինների մեծ մասը կմահանա, եթե վառելիքը սպառվի։ «Մենք կարող ենք փրկել երկու նորածնից մեկին, բայց բոլորին փրկել չենք կարողանա»,- ասել է նա։

Նրա բաժանմունքում 45 ինկուբատոր կա, այստեղ հիմնականում վաղահաս երեխաներն են, որոնք ծնվել են ժամանակից շուտ։ Ալ-Բյուլբյուլի խոսքով՝ կիրակի օրը նրա հիվանդանոցում սպառվել են սուրֆակտանտը եւ կոֆեինի ցիտրատը, որոնք սովորաբար օգտագործվում են վաղահաս երեխաների շնչառությանն օգնելու համար։ Երեխաների մեծ մասը ծայրահեղ վիճակում է։

Իսրայելը բազմիցս նախազգուշացրել է բնակիչներին հեռանալ Գազայի հյուսիսային հատվածից, ցամաքային ներխուժումից առաջ։ Պաղեստինի Կարմիր մահիկը տեղեկացրել է, որ իսրայելցի զինվորականները ուրբաթ երեք հրաման են արձակել Ալ-Քուդս հիվանդանոցի տարհանման մասին, որտեղ բուժում է ստանում ավելի քան 400 պացիենտ, ապաստան է տրամադրված մոտ 12 000 տեղահանված անձանց։ «Մենք միջոցներ չունենք նրանց անվտանգ տարհանման համար։ Պացիենտների մեծ մասը լուրջ վնասվածքներ ունի»,- CNN-ին տեղեկացրել է մամուլի քարտուղար Նեբալ Ֆարսահը։ Նա նշել է, որ 24 հիվանդանոցներ «ռմբակոծման վտանգի տակ են ցանկացած պահի, Իսրայելի տարհանման հրամանի պատճառով»։

Ալ-Քուդս հիվանդանոցում տեղեկացրել են, որ իսրայելական բանակը բազմիցս դիմել է իրենց՝ պահանջելով անհապաղ տարհանվել գիշերային ավիահարվածի պատճառով։

Իրավիճակը մեկնաբանելու խնդրանքին ՑԱԽԱԼ-ի ներկայացուցիչները պատասխանել են, որ խնդրել են Գազայի հատվածի հյուսիսային մասի բնակիչներին տարհանվել, որպեսզի «մեղմվի քաղաքացիական բնակչությանը հասցվելիք վնասը»։