ՄԱԿ-ը դեմ է Ուկրաինայում կասետային զինամթերքի կիրառմանը

ՄԱԿ-ի Մարդու իրավունքների գերագույն հանձնակատարի գրասենյակն արձագանքել է ԱՄՆ-ից Ուկրաինային կասետային զինամթերքի հնարավոր մատակարարմանը։ «Այս զինամթերքը սպանում և խեղում է մարդկանց հակամարտության ավարտից դեռ շատ ժամանակ անց։ Ուստի, անհրաժեշտ է անհապաղ դադարեցնել դրանց օգտագործումը»,- ուրբաթ օրը՝ հուլիսի 7-ին, Ժնևում ասել է կազմակերպության ներկայացուցիչը։

ՄԱԿ-ի Մարդու իրավունքների գրասենյակը Ռուսաստանին և Ուկրաինային կոչ է արել ստորագրել կասետային զինամթերքի կիրառման արգելքի մասին կոնվենցիան, որին միացել է ավելի քան 100 երկիր։

ՆԱՏՕ-ի գլխավոր քարտուղար Յենս Սթոլթենբերգն ուրբաթ ասել է, որ դաշինքն այս հարցում դիրքորոշում չունի, և Ուկրաինայի դաշնակիցներն իրենք են որոշում՝ մատակարարել արդյոք համապատասխան զինամթերքը, հաղորդում է DW-ի թղթակիցը Բրյուսելից։ Սթոլթենբերգը, սակայն, նշել է, որ թեև Ռուսաստանն ու Ուկրաինան օգտագործում են կասետային զինամթերք պատերազմում, Ռուսաստանը դա անում է մեկ այլ երկրի վրա հարձակվելու համար, իսկ Ուկրաինան՝ իր տարածքը պաշտպանելու համար։ Դաշինքի գլխավոր քարտուղարը հիշեցրել է, որ ՆԱՏՕ-ի անդամների թվում կան և՛ կոնվենցիան ստորագրած, և՛ դրան չմիացած երկրներ։

Գերմանիայի իշխանությունները, որոնք ստորագրել են կասետային զինամթերքի կիրառման արգելքի մասին կոնվենցիան, այնուամենայնիվ, ըմբռնմամբ են մոտենում մատակարարման ամերիկյան ծրագրերին։ «Մենք վստահ ենք, որ մեր ամերիկացի ընկերների՝ համապատասխան զինամթերք մատակարարելու որոշումը հեշտ չէր», - ուրբաթ օրը հայտարարել է Գերմանիայի կառավարության խոսնակ Շտեֆեն Հեբեստրեյթը: Նա նաև նշել է, որ Ռուսաստանն արդեն «լայնորեն կիրառել է կասետային զինամթերք» Ուկրաինայի դեմ, և Կիևը զենք կօգտագործի իր տարածքներն ազատագրելու համար։

ԱՄՆ-ն մոտ ապագայում կհաստատի կասետային զինամթերի մատակարարումն Ուկրաինա, հայտնում է The New York Times-ը՝ վկայակոչելով ԱՄՆ նախագահի վարչակազմի բարձրաստիճան պաշտոնյա Ջո Բայդենին։ Հրատարակությունը նշում է, որ ավելի վաղ Վաշինգտոնը խուսափում էր նման արկեր ուղարկել Կիև՝ քաղաքացիական բնակչության հնարավոր զոհերի պատճառով