Շատ պաշտոնյաներ են շահագրգռված դպրոցի փակմամբ․ Արմավիրի թիվ 4 ավագ դպրոցը շարունակում է դեմ լինել օպտիմալացմանը

ԿԳՄՍ նախարար Ժաննա Անդրեասյանի հետ հանդիպումն անցավ դրական մթնոլորտում, որոշվեց, որ նախագիծը կլրամշակվի, սակայն դա մեզ համար բավարար չէ, քանի որ մենք դեմ ենք դպրոցի փակմանը։ Այս մասին NEWS.am-ի հետ զրույցում ասաց Արմավիրի թիվ 4 ավագ դպրոցի տնօրեն Անի Քլաշյանը։

Հիշեցնենք, որ նախարարությունը նախատեսում է Արմավիրի թիվ 4 ավագ դպրոցը միավորել նույն քաղաքի թիվ 1 ավագ դպրոցի հետ: Նախագծի հիմնավորման մեջ միավորման անհրաժեշտությունը բացատրվում է երկու հաստատությունում էլ սովորողների թվի նվազման և շենքերի օպտիմալ օգտագործմամբ: Նշվում է, որ նախորդ ուսումնական տարում Արմավիրի թիվ 1 դպրոցն ունեցել է մոտ 290 աշակերտ: Շենքը նախատեսված է 1000-ի համար: Թիվ 4 դպրոցում եղել է մոտ 250 աշակերտ: Շենքի նախագծային հզորությունը 680 է:

«Ինչպես հասկանում ենք՝ շատ պաշտոնյաններ են շահագրգռված, որ այս դպրոցը փակվի, որովհետեւ շենքը շատ բանուկ հատվածում է, կենտրոնում է եւ կարող է ցանկացած կենտրոնի համար օգտակար լինե։ Մենք սա դեռեւս խոսակցությունների մակարդակով ենք լսում, բայց չենք ուզում հավատալ»,- նշեց նա։

Տնօրենի խոսքով՝ իրենց շենքն օգտագործելու են Արմավիրի բժշկական քոլեջը, սակայն նախկին նախագծի համաձայն այլ քոլեջներ եւս պետք է միացվեն, սակայն շենքի հզորությունը դա թույլ չի տա։

«Նախագիծը մեզ հետ չէր էլ քննարկվել, մենք հանրայնացվելուց հետո ենք իմացել։ Մենք նախարարին ասել ենք մեր հակափաստարկները, ասել է՝ կվերանայվի։ Բայց մենք բոլոր դեպքերում դեմ ենք, որովհետեւ արդար չէ, որ մեր բողոքները հաշվի չեն առնվում, մարդկանց հետ չի կարելի այսպես վարվել։ Մեր անձնակազմը 40 հոգուց ավելի է, եւ վստահաբար օպտիմալացման դեպքում ոչ բոլորն են աշխատանք ստանալու»,- ասաց Անի Քլաշյանը։