Հայաստանում բնական աճի ցուցանիշը 30 տարում կրճատվել է չորս անգամ
ՀԱՍԱՐԱԿՈՒԹՅՈՒՆԵրևանի պետական բժշկական համալսարանում այսօր՝ ապրիլի 6-ին, տեղի է ունեցել «Հայաստանում ժողովրդագրական իրավիճակի բարելավման առողջապահական ասպեկտները» թեմայով կոնֆերանսը:
Համալսարանի ռեկտոր Արմեն Մուրադյանն իր բացման խոսքում ընդգծել է, որ Հայաստանում գրանցվող ժողովրդագրական ցուցանիշները մտահոգիչ են՝ հաշվի առնելով, որ մեր երկրում յուրաքանչյուր մարդու կյանքը կարելի է ազգային անվտանգության խնդիր համարել։
Արմեն Մուրադյանն առողջապահական գործոնների կողքին առանձնացրել է նաև այլ պատճառներ։ Օրինակ, ամուսնությունների թիվը վերջին 10 տարվա ընթացքում 13 տոկոսով նվազել է, իսկ ամուսնալուծությունները 40 տոկոսով ավելացել, ընդ որում, ամուսնալուծվածների 85 տոկոսը երեխաներ չունեն։ Մուրադյանը մտահոգիչ համարեց նաև այն, որ կանայք այժմ ավելի ուշ տարիքում են ձգտում երեխա ունենալ։
«Միջին վիճակագրական տվյալներով` 1992թ․ Հայաստանում տղամարդիկ ամուսնանում էին 25 տարեկանում, իսկ այժմ՝ 30 տարի անց՝ 31 տարեկանում, աղջիկներն ամուսնանում էին 22 տարեկանում, այժմ՝ 28 տարեկանում։ 25 տարեկանում հղիանալու հավանականությունը 25 տոկոս է, 30 տարեկանում՝ 20 տոկոս, 35 տարեկանում հասնում է ընդհուպ 5 տոկոսի։ Եթե այս ցուցանիշներն ավելի վատթարանան, և ամուսնության միջին տարիքը դառնա 35-ը, ապա առողջապահական լրջագույն ներդրումներ կպահանջվեն, և սա մեզ համար ծայրահեղ մտահոգիչ է։ Ինչ տեխնոլոգիաներ էլ կիրառվեն, միևնույն է, բնությունն ունի իր օրենքը։ Կանայք պետք է ձգտեն հենց էֆեկտիվ տարիքում երեխաներ ունենալու»,- ասաց Մուրադյանը։
Նրա խոսքով՝ բնական աճի հիմնական ցուցանիշը 30 տարում կրճատվել է գրեթե չորս անգամ։ 1990 թվականին ծնվել էր գրեթե 80 հազար երեխա, 2000 թվականին՝ 33 հազարով վատթարացում է գրանցվել։ 2022 թվականին ծնվել է 36 հազար 353 երեխա։
«Այսօր արդեն ծննդաբերում են 2000-ական թվականներին ծնված աղջիկները։ 1․6 երեխա ունենալու պարագայում այս թիվը գնալով նվազելու է՝ հաշվի առնելով, որ ապագա մայրիկների թիվն է քչանում։ Մեզ խիստ անհրաժեշտ է, որ պարզ վերարտադրողականության ցուցանիշը 2․2 լինի՝ հաշվի առնելով մանկական մահացությունը, հաշմանդամությունը և անպտղությունը։ Այս ցուցանիշը նշանակում է՝ յուրաքանչյուր ընտանիքում 3 և ավելի երեխա։ Եթե 2015 թվականին ամեն յոթերորդ ընտանիքն էր ունենում երրորդ երեխա, այսօր գրեթե ամեն երրորդ ընտանիքում է ծնվում երրորդ և ավելի երեխան»,- նշեց ԵՊԲՀ ռեկտորը։
Արմեն Մուրադյանը բնական է համարում, որ տղաները ծնվում են ավելի շատ՝ 104/106 հարաբերակցությամբ, բայց մեր երկրում այդ հարաբերակցությունը չի պահպանվում առանձին խնդիրներով պայմանավորված։ 2022 թվականին 2037-ով ավելի աղջիկ է ծնվել։
Առավել մանրամասն՝ «Նյուզ»-ի տեսանյութում:
