«Հրթիռների գործով մեզնից ոչ ոք իրեն մեղավոր չի ճանաչում». Արտակ Դավթյան. 168.am
ՀԱՍԱՐԱԿՈՒԹՅՈՒՆ
1 տարի է՝ հրթիռների գործըդատարանում է, բայց, ըստ էության, տեղաշարժեր չկան, չեն հրավիրվել վկաները։ Համենայնդեպս, հունվարի 10-ի դրությամբ իրավիճակն այդպիսին էր:
Գործով անցնող ՀՀ պաշտպանության նախկին նախարար Դավիթ Տոնոյանը կամ նրա փաստաբանական խումբը ժամանակ առ ժամանակ հայտարարություն են տարածում դատական նիստերի հետաձգումների, ձգձգումների, քրեական գործի շինծու լինելու վերաբերյալ:
Հրթիռների գործով անցնում է նաեւ ՀՀ ԶՈւ գլխավոր շտաբի նախկին պետ Արտակ Դավթյանը, ուստի 168.am-ը փորձել է նրանից ճշտել՝ ինչպե՞ս է գնահատում դատական գործընթացը:
– Հրթիռների գործով դատական նիստերը տարբեր պատճառներով հետաձգվել են՝ դատավորների եւ մեղադրող կողմի գերզբաղվածության, դատավորի հերթապահության պատճառաբանություններով, եղել են տեխնիկական խնդիրներ: Գործով անցնող եւ կալանքի տակ գտնվող ՀՀ պաշտպանության նախկին նախարար Դավիթ Տոնոյանն այս ամենում դիտավորություն է տեսնում։ Այսինքն, ըստ նրա, դատարանը փորձում է շինծու քրեական գործի վերջնական փլուզումը կանխել: Ինչպե՞ս եք Դուք գնահատում դատական գործընթացը, նիստերի հետաձգման փաստերը, դրանք արհեստակա՞ն են ձգձգվում: Դուք եւ Ձեր փաստաբանական թիմը հայտարարություններ չեք անում, պասիվ եք՝ ի տարբերություն Դավիթ Տոնոյանի եւ նրա թիմի, երբեմն էլ գործով անցնող ԳՇ պետի նախկին տեղակալ Ստեփան Գալստյանի փաստաբաններն են ինչ-որ բաներ ասում լրատվամիջոցներին:
– Նիստերն ընթանում են, վերջերս ձգձգումներ եղան հիմնականում տեխնիկական պատճառներով՝ հոսանք չլինելու, հետո այնտեղ պիտի ինչ-որ բաներ նայեինք, տեխնիկական միջոցները չաշխատեցին (ապացույցների հետազոտման ընթացքում բացակայել կամ անաշխատ են եղել տեխնիկական միջոցները։- Մ.Պ), մեկ օր էլ այդ պատճառով ձգվեց: Չասեմ՝ արհեստական են դատական նիստերը ձգձգվում, բայց օբյեկտիվ եւ սուբյեկտիվ պատճառներ կան: Դա յուրաքանչյուրը յուրովի է գնահատում:
– Իսկ հրթիռների գործի մասին, առհասարակ, ի՞նչ կարծիք ունեք, ինչպե՞ս եք գնահատում այն:
– Մեզնից ոչ ոք իրեն մեղավոր չի ճանաչում եւ մինչեւ վերջ կներկայացնենք մեր տեսակետները: Մենք բոլորս, ովքեր անցնում ենք այս գործով, համարում ենք, որ այնպիսի բան չենք արել, որը հակասում է օրենքներին, կամ ի նպաստ չի եղել մեր զինված ուժերի զարգացմանը: Դատարանում ընթանում է գործի քննությունը: Փորձելու ենք ապացուցել՝ ինչ որ արվել է, արվել է օրենքի սահմաններում եւ ի նպաստ մեր պետությանը:
– Պարոն Դավթյան, Դուք ժամանակին եւ երկար տարիներ զբաղեցրել եք Զինված ուժերի գլխավոր շտաբի օպերատիվ վարչության պետի պաշտոնը, արդեն մոտ 10 օր է՝ թափուր է այսօր արդեն ՀՀ ԶՈւ ԳՇ օպերատիվ գլխավոր վարչության պետ-ՀՀ զինված ուժերի գլխավոր շտաբի պետի տեղակալի պաշտոնը։ Նորմա՞լ է, երբ նման կարեւոր պաշտոնը 10 օր թափուր է ստեղծված պայմաններում:
– Ես ի՞նչ մեկնաբանեմ, նույն տրամաբանությամբ երկար ժամանակ թափուր էր ԳՇ պետի պաշտոնը, հետո ԶՈՒ ԳՇ հետախուզության գլխավոր վարչության պետի պաշտոնը: Ընդհանրապես նորմալ չեմ համարում, բայց նշանակողներին եւ ազատողներին պիտի հարցերն ուղղեք, ովքեր զբաղվում են այդ գործերով:
– Նաեւ Ձեզ ենք ուղղում, որովհետեւ օպերատիվ վարչության պետ եք եղել, վարչության խնդիրներին ծանոթ եք:
– Բնական է՝ ցանկացած պաշտոն, որ թափուր է, նորմալ չէ: Իսկ գլխավոր պաշտոնները Զինված ուժերում ցանկալի է, որ լինեն համալրված:
