Շվաքարա՞ն, թե՞ կրպակ, այս է խնդիրը. Գառնիի «Քարերի սիմֆոնիա»-ում հետաքրքիր զարգացումներ են

Մոտ երկու շաբաթ է՝ Գառնիի «Քարերի սիմֆոնիա» կամ «Բազալտե երգեհոն» բնական հուշարձան այցելությունը դարձել է վճարովի՝ 200 դրամ մուտքավճարով: Ավելի վաղ լուրեր էին տարածվել, որ պատմամշակութային հուշարձանի տարածքում նաև ինչ-որ կրպակ է տեղադրվել:

«Պրոֆեսիոնալ Զբոսավարների Հայկական Ասոցիացիայի» նախագահ Յաշա Սոլոմոնյանը ընդհանուր առմամբ բացասական չի գնահատում մուտքավճարի սահմանումը.

«Որքանով ես եմ տեղյակ, համայնքն է նման որոշում կայացրել, քանի որ այն համայնքային ենթակայության տարածք է: Գումարի հիմնավորումը տեղում հսկողություն և մաքրություն իրականացնելն է: Եթե այդ ամենը պահպանվի, հուշարձանի տարածքում վերահսկողություն իրականացվի, բացասաբար չեմ վերաբերվում որոշմանը: Անկեղծ, չեմ կարծում՝ այդ երկու հարյուր դրամը բացառիկ թանկարժեք է, ավելի շուտ սիմվոլիկ ինչ-որ գումար է»,- 1or.am-ի հետ զրույցում ասաց Սոլոմոնյանը: 

Անդրադառնալով հուշարձանի տարածքում կրպակի տեղադրմանը՝ Սոլոմոնյանը նշեց.

«Այդ մասով մենք բազմիցս խոսել, բարձրաձայնել ենք՝ թե՛ Տուրիզմի կոմիտեին, թե՛ համայնքապետարանին, թե՛ Շրջակա միջավայրի նախարարությանը: Դրան, իհարկե, դեմ ենք, որովհետև նման բաներն աղճատում են հուշարձանի իրական տեսքը: Տարբեր կրպակներ հեռացնել տվեցինք, բայց, կարծես, անընդհատ սնկի պես դրանք նորից բուսնում են»:

Գառնի համայնքի ղեկավար Տիգրան Պողոսյանը մեզ հետ զրույցում նշեց, որ «Քարերի սիմֆոնիայի» ճանապարհը վերանորոգվել է, տարածքը՝ բարեկարգվել.

«Մուտքավճարը սահմանվել է, որովհետև այնտեղ մարդիկ են աշխատում, սպասարկում է իրականացվում: Մուտքավճարը գալիս է համայնքի բյուջե, որտեղից էլ վարձատրում ենք այդ մարդկանց»:

Հարցին՝ դա որևէ կերպ կարո՞ղ է անդրադառնալ դեպի հուշարձան այցելուների հոսքի վրա, համայնքի ղեկավարը պատասխանեց.

«Ոչ, մարդիկ հիմա ավելի ոգևորված են: Այնտեղ մեքենա չի իջնում, ստիպված են ոտքով քայլել, իսկ բարեկարգումից հետո ամեն ինչ ավելի հեշտ է»:

Ինչ վերաբերում է հուշարձանի մոտ տեղադրված կրպակին, համայնքի ղեկավարն ասաց՝ «այնտեղ որևէ կրպակ չկա»:

Գառնիի համայնքապետարանի պաշտոնական էջում, այնուամենայնիվ, գտանք համայնքի ավագանու 2022 թվականի հունիսի 3-ի N 67-Ա որոշումը, որով «թույլատրվում է համայնքի ղեկավարին՝ Կոտայքի մարզի, Գառնի համայնքի «Քարերի սիմֆոնիայի» տարածքում տեղադրել շվաքարան՝ այցելուների համար անվտանգ վայրը ապահովելու համար»:

Ընդ որում, նոր շվաքարանը տեղադրելու համար Հայաստանի տարածքային զարգացման հիմնադրամի՝ (ՀՏԶՀ) Համաշխարհային բանկի և ՀՀ կառավարության միջոցներով, իրականացված ծրագրի  շրջանակներում տեղադրված շվաքարանը տեղափոխվել է 20 մետր հեռու տեղադրված վայրից՝ «ավելի անվտանգ վայր ապահովելու համար»:

Գուցե հենց շվաքարա՞նն է կրպակի տպավորություն թողնում, ո՞վ գիտի:

Մարիամ Նալբանդյան