ԱՄՆ ներկայացուցիչների պալատն ընդունել է Թուրքիային F-16-ի վաճառքը բարդացնող փոփոխությունը

ԱՄՆ Կոնգրեսի Ներկայացուցիչների պալատը կողմ է քվեարկել 2023 ֆինանսական տարվա ռազմական բյուջեի հաստատած նախագծում արվող փոփոխությանը, որը պետք է դժվարացնի Թուրքիային նոր F-16 կործանիչների վաճառքը։ Փոփոխության ընդունման մասին Twitter-ում հայտնել է կոնգրեսական Ֆրենկ Փալոնը։

Ավելի վաղ ԱՄՆ նախագահ Ջո Բայդենը հայտարարել էր, որ Անկարային կործանիչներ մատակարարելու համար անհրաժեշտ է Կոնգրեսի հավանությունը։ Նա հույս էր հայտնել, որ այդ թույլտվությունը կհաջողվի ստանալ։

Միևնույն ժամանակ, դեմոկրատ Քրիս Պապասի և մի շարք այլ օրենսդիրների առաջարկած փոփոխությանը կողմ է քվեարկել 244 կոնգրեսական, այդ թվում` 184 դեմոկրատ և 60 հանրապետական։

Ինչպես հարցի քննարկմանը նշել է Փալոնը, Թուրքիային ամերիկյան ժամանակակից կործանիչների վաճառքը չի դրդի Էրդողանին լավ դաշնակից դառնալ։ Ամերիկացի քաղաքական գործիչը համարում է, որ այդ զենքն ավելի շուտ տարածաշրջանում նոր զոհերի և ավերումների կհանգեցնի։

Փոփոխությունն արգելում է F-16 և այդ կործանիչների արդիականացման համար նախատեսված բաղկացուցիչ մասերի վաճառքը կամ փոխանցումն Անկարային, այն պարագայում, եթե ԱՄՆ նախագահը չհաստատի, որ այդ փոխանցումը համապատասխանում է Միացյալ Նահանգների ազգային շահերին, և եթե Կոնգրեսին չերաշխավորի, որ փոխանցումից անմիջապես առաջ 120 օրվա ընթացքում Թուրքիայի կառավարությունը չի խախտել Հունաստանի ինքնիշխանությունը, այդ թվում՝ օդային տարածքը։

Նախագահը Ներկայացուցիչների պալատի և Սենատի համապատասխան կոմիտեներին պետք է երաշխավորի նաև, որ Թուրքիան չի խաթարել ՆԱՏՕ-ի անդամ երկրների ընդհանուր անվտանգությունը։

Հիշեցնենք, որ ԱՄՆ-ն պաշտոնական ծանուցում էր հղել Թուրքիային` Անկարայի կողմից ռուսական С-400 ՀՕՊ համակարգերի ձեռքբերման պատճառով F-35 նորագույն կործանիչների մատակարարման ծրագրից նրան հեռացնելու մասին։ Վաշինգտոնը չեղարկել էր Թուրքիայի հետ F-35-ի վերաբերյալ համատեղ հուշագիրը` ստորագրելով այն F-35-ի նախագծի մյուս 7 գործընկերների հետ։

Թուրքիայի նախագահ Ռեջեփ Թայիփ Էրդողանը հետագայում հայտարարել էր այլ կործանիչներ գնելու ԱՄՆ-ի առաջարկի մասին, բայց ոչ թե հինգերորդ, այլ չորրորդ սերնդի (F-16): Այդ հարցը անհրաժեշտ է համաձայնեցնել ԱՄՆ Կոնգրեսում։ Պետդեպը փորձում է համոզել կոնգրեսականներին, որ գործարքը համապատասխանում է Վաշինգտոնի շահերին։