Ոչ աշխատանքային օրով՝ շնորհավորական ուղերձ, սահմանային իրավիճակի մասին՝ ոչինչ
ՀԱՍԱՐԱԿՈՒԹՅՈՒՆ
ՊՆ-ն ժամեր առաջ հաղորդագրություն է տարածել, որ երեկ՝ ժամը 21։15-ի սահմաններում, Ադրբեջանի ԶՈՒ ստորաբաժանումները, տարբեր, այդ թվում նաև խոշոր տրամաչափի հրաձգային զինատեսակներից կրակ են բացել հայ-ադրբեջանական սահմանի արևմտյան, մասնավորապես՝ Վայոց Ձորի մարզի Խաչիկ գյուղի հատվածում տեղակայված հայկական մարտական դիրքերի, ինչպես նաև դեպի գյուղ տանող ճանապարհի ուղղությամբ, ինչի հետևանքով վնասվել է համայնքի ղեկավարի ավտոմեքենան։ Հայկական կողմի պատասխան գործողություններով ադրբեջանական ստորաբաժանումների կրակը լռեցվել է, մեր կողմից տուժածներ չկան։
Խաչիկ գյուղը գտնվում է Արենի համայնքի վարչական տարածքում: Համայնքապետարանի ո՛չ պաշտոնական, ո՛չ ֆեյսբուքյան էջում չկա որևէ հաղորդագրություն այս թեմայով:
Համայնքապետարանի պաշտոնական էջում վերջին գրառումն ուղիղ մեկ շաբաթ առաջվա է՝ «Իմ Քայլը» հիմնադրամի ինչ-որ ծրագրի վերաբերյալ: Չնայած ոչ աշխատանքային օրվան՝ ֆեյսբուքյան էջում չեն զլացել տեղադրել համայնքի ղեկավարի շնորհավորական ուղերձը, բայց սահմանային իրավիճակի մասին՝ դարձյալ ոչինչ: Նույն պատկերը նաև Վայոց ձորի մարզպետարանի ֆեյսբուքյան և պաշտոնական էջերում է:
1or.am-ը փորձեց գյուղում գիշերը և այս պահին տիրող իրավիճակի մասին տեղեկություններ ստանալ Արենի համայնքի ղեկավար Հուսիկ Սահակյանից կամ Խաչիկի վարչական ղեկավար Հովիկ Սմբատյանից: Երկու դեպքում էլ՝ ապարդյուն, հեռախոսահամարներն անհասանելի են:
Այնուամենայնիվ, մեզ հաջողվեց կապ հաստատել Խաչիկի բնակիչներից մի քանիսի հետ, ովքեր հայտնեցին, որ գիշերն իրավիճակը հանգիստ է եղել, այս պահին նույնպես կրակոցներ չկան:
