Նախկին պաշտոնյաների հետ փոխկապակցված ընկերությունները գրավում են էներգետիկ շուկան

Էլեկտրաէներգիայի շուկայի ազատականացման գործընթացը թևակոխել է գործնական փուլ: ՀԾԿՀ-ն մինչ օրս լիցենզիա է տրամադրել 6 մատակարարի և 3 թրեյդերի, որոնք էլեկրտաէներգիան արտադրողից պիտի հասցնեն սպառողին: Ուշագրավն այս պատմության մեջ այն է, որ այդ կազմակերպությունների մի մասը կապ ունի նախկին պաշտոնյաների հետ:

Էլեկտրաէներգիայի մատակարար է լինելու «Օպտիմում էներջի» ՍՊԸ-ն, որը ստեղծվել է 2013 թվականին: Դրա մասնակիցները երկուսն են` Արմեն Ղարիբյանը (50%) եւ Հայկ Հարությունյանը (50%): Հայկ Հարությունյանը Էներգետիկայի նախկին փոխնախարարն է` նախկին վարչապետ Կարե Կարապետյանի փեսան:

Արմեն Ղարիբյանն ու Հայկ Հարությունյանը 2018-22թթ.-ին մի շարք նոր ընկերություններ են ստեղծել, որոնք, անվանումներից դատելով, նույնպես էներգետիկայի ոլորտում են գործելու, չի բացառվում` նաև մատակարարներ դառնան:

2020թ. ստեղծված «Նյու էներջի» ՓԲԸ-ի բաժնեմասում Արմեն Ղարիբյանի և Հայկ Հարությունյանի հետ մասնակցություն ունի նաև Կարեն Կարապետյանի որդին` Տիգրան Կարապետյանը:  Նույն անձինք կիսում են նաև «Հելիոս էներջի» ՓԲԸ-ի բաժնեմասը: 

Այստեղ հարկ է ուշադրություն դարձնել այն բանի վրա, թե ունի տվյալ անձը քաղաքական ազդեցություն, թե ոչ: Ինչպես տեսնում ենք` սևը սպիտակի վրա նշված է, որ այո, հետևաբար ստացվում է, որ ազատականացման անվան տակ շուկա են մտնում քաղաքական դերակատարություն ունեցող ակտորները:

«Արգեստ» ՓԲԸ-ն ստեղծվել է 2018թ. փետրվարին: Միակ բաժնետերը Գոռ Սուրիկի Բարոյանն է: Այս թրեյդերը Սամվել Կարապետյանին և ՀԷՑ-ին փոխկապակցված ընկերություն է: Հետևաբար դժվար է ասել, թե ինչ ազատականացման մասին է այստեղ գնում խոսքը:

Նշենք, որ մատչելի էներգիա արտադրող խոշոր կայանները դեռ չեն մտել ազատականացման շուկա, հետևաբար հարց է առաջանում, թե ինչ պետք է տա շուկայի նման ազատականացումը շարքային սպառողին: Պարզապես իշխանությունների թողտվությամբ դաշտը կրկին հանձնվում է այսպես ասած` նախկիններին, քանի որ, ըստ ՔՊ-ի, թերևս նորը դա լավ մոռացված հինն է....