Անվտանգ միջոց. Հայաստանում հայտնագործվել էկոլոգիապես մաքուր արտադրանք
ՀԱՍԱՐԱԿՈՒԹՅՈՒՆ
Mir24.tv-ն գրում է, որ հայ գիտնականները նոր սերնդի ախտահանիչ և կոսմետիկ միջոցներ են հորինել: Դրանք շատ ավելի անվտանգ են շրջակա միջավայրի համար, քան առկա լվացքի փոշիներն ու շամպունները։ Այդ ախտահանիչները ստեղծվել են Երևանի պետական համալսարանի քիմիայի ֆակուլտետում։ Դրանք չեն չորացնում մաշկը, չեն առաջացնում ալերգիա և, որ կարևոր է, չեն աղտոտում շրջակա միջավայրը։ Երիտասարդ քիմիկոսները վստահ են, որ վաղուց ժամանակն է փոխել ախտահանող միջոցների և օծանելիքների արտադրության հնացած տեխնոլոգիաները։
«Մեծ քանակությամբ ֆոսֆորի և ազոտի նման նյութերը, երբ մտնում են ջրի բաղադրության մեջ, աղտոտում են խմելու ջրի աղբյուրները։ Դրանց ավելցուկը կարող է զգալի վնաս հասցնել շրջակա միջավայրին»,- ասել է Երևանի պետական համալսարանի քիմիայի ֆակուլտետի անօրգանական և անալիտիկ քիմիայի ամբիոնի կրտսեր գիտաշխատող Վլադիմիր Վարդապետյանը:
Քիմիա ուսումնասիրող նոր սերնդի ուսանողները ախտահանիչ և լվացող միջոցների մշակմանը ձեռնամուխ են եղել դրամաշնորհ ստանալուց հետո: Նրանք կանգ չեն առել շամպունների ու լվացքի փոշիների վրա։ Աշխատանքի արդյունքը եղել են նաև քսուքները, սկրաբները և նույնիսկ մատնահարդարման այնպիսի միջոցները, որոնք չեն պարունակում ֆոսֆոր և ազոտ։ Հումքի համար պարտադիր բաղադրիչ են A, B, C վիտամինները և ծաղիկների էքստրակտները։
«Օրինակ, այս ապրանքից նարդոսի հոտ է գալիս, որը մենք ինքներս ենք աճեցնում և ավելացնում քսուքներին։ Այն բանից հետո, երբ սկսեցինք նման քսուքներ արտադրել, ես սկսել եմ օգտագործել միայն դրանք։ Դրանք օգտագործելուց հետո մաշկը երկար ժամանակ է մնում թավշյա»,- ասել է Երևանի պետական համալսարանի ուսանողուհի Աննա Սոլոյանը։
Երիտասարդ գիտնականները մտադիր են քիմիական լաբորատորիա բացել իրենց նախագծերը բարելավելու համար: Նրանք երազում են շուկայում ագրեսիվ կենցաղային քիմիկատները փոխարինել սեփական էկոլոգիապես մաքուր արտադրանքով: Միևնույն ժամանակ նրանք իրենց նոր արտադրանքով մասնակցում են միջազգային համաժողովների և ցուցահանդեսների։
Նյութը հրապարակման պատրաստեց Կամո Խաչիկյանը
