Արտադրված է Նոյեմբերյանում. «Մեղրիկ»՝ մաքուր մեղր՝ երկար տարիների փորձով և գիտելիքով
ՀԱՍԱՐԱԿՈՒԹՅՈՒՆ
Սահմանամերձ Նոյեմբերյանում Ամիրաղյանների ընտանիքն արդեն երկար զբաղվում է մաքուր մեղրի արտադրությամբ. այս գործում նրանց օգնում է երկար տարիների փորձը և գիտելիքը.
«Մեղվաբուծությամբ զբաղվել է ամուսնուս պապիկը, այնուհետև` հայրիկը, իսկ հիմա զբաղվում է ամուսինս՝ Սարգիսը։ Ես ավելի շատ օգնականի և օնլայն վաճառք կատարողի դերում եմ։ Սարգիսը մանուկ հասակից ականատես է եղել մեղվաբուծության հետ կապված բոլոր գործընթացներին և ավելի հմուտ է այդ գործում, քան ես։ Ես այս գործին ծանոթացել եմ, երբ երեխա ժամանակ գնում էինք Սիսիան՝ իմ հորաքրոջ տուն , որտեղ հորաքրոջս տղան նույնպես մեղվապահությամբ էր զբաղվում։ Այդ ամենը կրելով մեր մեջ՝ մենք որոշեցինք հանրությանը ներկայանալ «Մեղրիկ» ապրանքանիշով»,- 1or.am-ի հետ զրույցում պատմում է Լիանան՝ Ամիրաղյանների հարսը։
Լիանայի խոսքով՝ իրենք սերնդեսերունդ շարունակում են մեղվաբուծությունը թե՛ որպես ընտանեկան բիզնես, թե՛ հոբբի.
«Այս ընթացքում ես շատ բան եմ սովորել մեղվի և մեղվապահության մասին, այդ գործում ինձ օգնել են թե՛ ամուսնուս լուսահոգի հայրը, թե՝ ամուսինս։ Ես ինձ բացահայտում եմ այդ աշխարհում և սիրով եմ գնում մեղվանոց:
Մեր «Մեղրիկի» լոգոյի ստեղծման գործում մեծ դեր ունի Սիրանուշը՝ Սարգիսի քույրը, որի համար անչափ շնորհակալ ենք։ Իսկ անունը ծնվել է ընտանիքում՝ համընդհանուր քննարկման արդյունքում։ Երբեք վաճառքի խնդիր չենք ունեցել։ Հետագայում նպատակ ունենք ավելի ընդլայնել մեր բիզնեսը և նոր արտադրանքով հանդես գալ։ Քանի որ իմ գլխում հիմա հազար ու մի գաղափար կա, դեռ պետք է մտածել, թե որն է ավելի կարևորը»։
Մեղուների հետ հիմնական աշխատանքները սկսվում են գարնանը։ Մեղվաբույծը պիտի շատ ուշադիր լինի մեղվաընտանիքի աշխատանքին: Սարգիսը վստահ է՝ մեղվաբույծը պիտի իմանա ամեն ինչ։
«Այս միջատները աղմուկ չեն սիրում։ Այդ իսկ պատճառով մենք նրանց պահում ենք բնակավայրից փոքր-ինչ հեռու։ Միջատներն իրենք կարգավորում են իրենց ընտանիքի աշխատանքը շատ գեղեցիկ ձևով, և մեզ մնում է միայն անհրաժեշտ պահին նրանց ապահովել անհրաժեշտ հումքով։ Մեղվաընտանիքի աշխատունակության, աճեցման և մեր աշխատանքի որակի բարձրացման գործում շատ կարևոր է փեթակի որակը և կառուցվածքը։ Եթե սկսեմ խոսել մեղվից և նրա կատարած աշխատանքից, երկար կխոսեմ։ Անվերջ կարելի է խոսել այդ մասին և բացահայտումներ անել։ Ինձ համար դա մի ուրիշ աշխարհ է՝ մաքուր և չաղտոտված, ինչպիսին չի կարող լինել մարդկային կյանքը։ Մեղուն շատ խելացի միջատ է, մարդը նրանից շատ բան պիտի սովորի»:
Մեղրը առողջարար հատկությունների մասին բոլորս գիտենք. Այն չի փչանում, չի հնանում, օգտագործվում է թե՛ կենցաղում, թե՛ բժշկության մեջ։ Մեղրի գույնն ու համը պայմանավորված են ծաղիկների նեկտարով.
«Մեղվաբուծությունը ինձ սովորեցրել է շատ ու շատ բաներ։Կարող է անհավանական թվալ բայց այն ինձ սովորեցրել է մարդկանց հետ շփման հմտություններ։ Սովորեցրել է աշխատել և չհոգնել աշխատանքից։ Երբ մեղվաընտանիքում մեկը գլուխ է պահում և չի աշխատում, նրան դուրս են հանում փեթակից և համարում անպիտան։ Անգործությունը հիվանդություն է։ Մեղվից և նրա կենսակերպից անվերջ կարելի է սովորել»,- նշում է Լիանան։
«Մեղրիկն» իր վաճառքն իրականացնում է մեծամասամբ Տավուշի մարզում։ Բայց վերջին տարիներին ընդլայնել է իր վաճառքի սեգմենտները տարածաշրջանային առումով, ինչին նպաստել է նաև սոցկայքերում ակտիվությունը:
Մարիամ Նալբանդյան
