Նոյեմբերյանի Թիվ 2 հիմնական դպրոցի դասվարը ԿԳՄՍՆ կողմից ստացել է որակավորման երկրորդ աստիճանի տարակարգ

ՀՀ Տավուշի մարզի Նոյեմբերյանի Թիվ 2 հիմնական դպրոցի դասվար Աննա Անտոնյանը ԿԳՄՍ նախարար Վահրամ Դումանյանի հրամանով ստացել է որակավորման երկրորդ աստիճանի տարակարգ՝ հինգ տարի ժամկետով:

«Հանրակրության մասին» օրենքով սահմանված է, որ որակավորման տարակարգը ուսուցչի մասնագիտական գիտելիքներին և աշխատանքային ունակություններին ու կարողություններին համապատասխանող որակավորման չափանիշն է։ Ուսուցչի որակավորման տարակարգերի բնութագրիչները սահմանում է կրթության պետական կառավարման մարմինը` հիմք ընդունելով ուսուցչի գիտելիքների, մանկավարժական աշխատանքային հմտությունների և ունակությունների ծավալը, ստեղծագործական-հետազոտական գործունեության արդյունավետությունը, մասնագիտական աշխատանքի ստաժը, մանկավարժական գործունեության որակական այլ ցուցանիշներ, ներառյալ՝ պարգևատրումը, համապատասխան մրցույթների մասնակցությունը, մասնագիտական կատարելագործմանն ուղղված վերապատրաստումները և այլն: 

«2019 թվականին ստացել եմ ուսուցչի որակավորման առաջին աստիճանի տարակարգ, որից երկու տարի հետո դիմեցի երկրորդ աստիճանի տարակարգ ստանալու համար: Երկրորդ տարակարգի համար ներկայացրել եմ 4 բաղադրիչ՝ «ԿՏԱԿ»-ում վարել եմ դասընթաց, տպագրել եմ հոդված «eTwinning Plus»-ում մասնակցել եմ դասընթացի, համագործակցել  տարբեր  երկրների  ուսուցիչների հետ՝  ստանալով եվրոպական  հավաստագիր և բնութագրիչներ եմ ներկայացրել՝ ուսուցիչների, ծնողների, աշակերտների կողմից»,- 1or.am-ի հետ զրույցում նշեց Աննա Անտոնյանը: 

Ուսուցչի խոսքով՝ ինքը փորձում է նորարական մեթոդներ կիրառել և երեխաների համար ուսուցման գործընթացն ավելի գրավիչ դարձնել. 

«Երեկ, օրինակ, իմ ծննդյան տարեդարձն էր, որն աշակերտներս իսկական տոնի վերածեցին, ինձ համար հաճելի անակնկալ էին պատրաստել: Նրանցից մեկը, ով Երևանից է տեղափոխվել մեր դասարան, բարեմաղթանքներ ասելու ժամանակ նշեց, որ ինքը Երևանում երբեք այսպիսի կրեատիվ դասեր չի ունեցել, ինչպիսին մենք ենք անցկացնում, որ մեր դասերը շատ հետաքրքիր են անցնում: Ես իրոք մեծ հպարտություն զգացի և շատ ուրախացա, որ կարողանում ենք երեխաների համար հետաքրքիր դարձնել դասապրոցեսը:

Այս պահին ընդգրկված եմ «Դասավադի՛ր, Հայաստան» կրթական հիմնադրամի երկամյա ծրագրում, հանդես եմ գալիս որպես ուսուցիչ-առաջնորդ: Ծրագիրն ինձ անձնային աճի բազում հնարավորություններ ընձեռեց,օգնեց ավելի կատարելագործվել, դասերն ավելի հետաքրքիր վարել, երեխաների հետ նախագծային աշխատանքներ անցկացնել,նրանց մեջ զարգացնել առաջնորդական հմտություններ և նախաձեռնողականություն:

Այժմ իմ երեխաների հետ մի նախագծի վրա ենք աշխատում, որի շրջանակներում ուզում ենք տպագրել սեղանի օրացույց: Օրացույցի յուրաքանչյուր էջին պատկերված կլինեն Նոյեմբերյանի թաքնված գանձերը՝ տեսարժան վայրեր, նշանավոր մարդիկ և այլն: Աշխատանքն այժմ տպագրության փուլում է, մինչև մայիսի վերջ արդեն նախագիծն իրականացված կլինի»:

Հավելենք, որ 2022 թվականին Աննա Անտոնյանը Տավուշի մարզից միակ ուսուցիչն է, ով ԿԳՄՍՆ կողմից որակավորման երկրորդ աստիճանի տարակարգ է ստացել:

Մարիամ Նալբանդյան