Ռուսաստանի հետ հակամարտությունում ՆԱՏՕ-ին սպասում է տհաճ անակնկալ ի դեմս Մոսկվայի դաշնակիցների
ՄԻՋԱԶԳԱՅԻՆ
infox.ru-ն գրում է, որ արագ փոփոխվող քաղաքական իրավիճակը ցույց է տալիս, որ ՆԱՏՕ-ի հետ ռազմական հակամարտության դեպքում Ռուսաստանն այլևս «միայնակ ռազմիկ» չի լինի։ Ներկայումս ամերիկյան ղեկավարությունը ակնհայտորեն շփոթված տեսք ունի։ Հողը սահում է ԱՄՆ-ի ոտքերի տակից, և նրանց հեգեմոնիան աշխարհում այլևս այդքան միաձույլ չի թվում։
Շատ երկրներ են կտրականապես հրաժարվել Ռուսաստանի դեմ պատժամիջոցներ կիրառելուց։ ՄԱԿ-ում քառասուն երկրներ չեն դատապարտել Մոսկվային Դոնբասում իր գործողությունների համար։ Ինքը՝ Ռուսաստանը, բացահայտ ասում է, որ ոչ մի հարձակում չի խանգարի իրեն հատուկ գործողությունը հասցնել իր տրամաբանական ավարտին։ Ամեն ինչ խոսում է այն մասին, որ Ռուսաստանի շուրջը գործնականում համախմբվել է հզոր հակաամերիկյան, հակաարևմտյան և նույնիսկ հակա ՆԱՏՕ-ական բռունցք:
Ինչպես բացատրել է բրիտանացի լրագրող Լիամ Դոյլը, եթե Վաշինգտոնում կամ Բրյուսելում որևէ մեկը մի օր ունենա Ռուսաստանի հետ բաց մարտ սկսելու հիմար գաղափար, ապա նրանք ստիպված կլինեն դիմակայել ոչ միայն ռուսական բանակի հզորությանը, այլ նաև նրա դաշնակիցներին: Մոսկվային ամեն ինչում աջակցողը Չինաստանն է, որն ունի հզոր բանակ և ֆինանսական մեծ հնարավորություններ։ Գոյություն ունի նաև Հավաքական անվտանգության պայմանագրի կազմակերպությունը (ՀԱՊԿ): Ներկայումս այդ կառույցի անդամներն են բացի Ռուսաստանից Հայաստանը, Ղազախստանը, Ղրղզստանը, Տաջիկստանը և Բելառուսը։
Ինչ-որ մեկը կասի, որ դրանք ոչ շատ մեծ և ոչ այնքան հզոր երկրներ են։ Բայց եթե, ինչպես ասում են, աշխարհը թելի վրա է, ապա աջակցությունը շոշափելի կլինի։ Չի կարելի հաշվարկից հանել նաև Հնդկաստանին, որը, չնայած Չինաստանի հետ տարաձայնություններին, ավանդաբար մոտ է Ռուսաստանին, այդ թվում ռազմական ոլորտում։ Կան նաև Իրանն ու Սիրիան։ Եվ նաև, ըստ բրիտանացի լրագրողի, նույնիսկ ԱՄՆ-ի ներկայիս դաշնակիցները և ՆԱՏՕ-ի որոշ անդամները կարող են բռնել Ռուսաստանի կողմը, օրինակ Թուրքիան և Սաուդյան Արաբիան։ Բացի այդ, Սպիտակ տունն ինքը պետք է հաշվի առնի, որ դաշինքի ոչ բոլոր անդամներն են պատրաստ Ռուսաստանի դեմ պատերազմի։ Ավելին, Իտալիայի, Գերմանիայի, Ֆրանսիայի և այլ երկրների ղեկավարները հիմնականում մի կողմ են թողել նման հակամարտությանը իրենց մասնակցության հնարավորությունը։ Այնպես որ, Ամերիկան, որը միշտ սիրել է իրեն շրջապատել «ընկեր-արբանյակներով», ինքը, այդ դեպքում, մենակ կմնա։
Նյութը հրապարակման պատրաստեց Կամո Խաչիկյանը
