Հրվ. Կորեայի նախագահը հայտարարել է, որ ԿԺԴՀ-ի հետ երկխոսությունը չի կարելի դադարեցնել

Հարավային Կորեայի նախագահ Մուն Չժե Ինը հայտարարել է, որ չի կարելի դադարեցնել ԿԺԴՀ-ի հետ երկխոսությունը, չնայած հյուսիսկորեական հրթիռի արձակմանը: Այդ մասին, ինչպես տեղեկացնում է «Արմենպրես»-ը, հաղորդել է «Ռյոնհապ» գործակալությունը: Մուն Չժե Ինը հանդես է եկել Կանին-Չեչժին երկաթուղային տեղամասի շինարարության բացման արարողությանը:

Չեչժին հարավկորեական կայարանն արդեն միացված է հյուսիսկորեական Կամխո կայարանին, ուստի մինչև 2027 թվականը Կանին-Չեչժին տեղամասի պլանավորված ավարտը կնշանակի Հարավային և Հյուսիսային Կորեաների միացում և երկաթուղային միասնական ցանցի ստեղծում Կորեական թերակղզում: «Այսօր Հյուսիսային Կորեան իրականացրել է փոքր հեռահարության չճանաչված արկի փորձնական արձակում: Բայց այս իրադրության հիմնավոր հաղթահարման համար մենք չպետք է դադարեցնենք երկխոսությունը… Ես անհանգստացած եմ այն բանով, որ (արձակման պատճառով) կմեծանա լարվածությունը և լճացումը միջկորեական հարաբերություններում կարող է խորանալ»,-հայտարարել է նախագահը:

Նա հավելել է, որ ԿԺԴՀ-ն պետք է ավելի շատ ջանքեր գործադրի երկխոսության համար: Հարավային Կորեայի բարձր պաշտոնատար անձինք Ազգային անվտանգության խորհրդի (ԱԱԽ) արտակարգ նիստում նույնպես ընդգծել են Հյուսիսային Կորեայի հետ երկխոսության վերսկսման կարևորությունը: Ավելի վաղ հարավկորեացի զինվորականները հայտարարել են, որ ԿԺԴՀ-ն Հյուսիսային Կորեայի ներքին շրջաններից հունվարի 5-ին ժամը 08:10-ին (Երևանի ժամանակով 03:10-ին) ենթադրվում է մեկ բալիստիկ հրթիռի արձակում է իրականացրել Ճապոնական ծովի կողմը: Հարավկորեական «Ռյոնհապ» գործակալությունը նշել է, որ, ամենայն հավանականությամբ, արձակվել է փոքր հեռահարության բալիստիկ հրթիռ:

Նաև այն ենթադրություններն են արվում, որ ԿԺԴՀ-ն հրթիռի արձակումը կարող էր իրականացնել հյուսիսկորեական ձմեռային զորավարժությունների շրջանակներում: Սա ԿԺԴՀ-ի սպառազինությունների առաջին հնարավոր փորձարկումն է այս տարի: Նախորդը տեղի է ունեցել 2021 թվականի հոկտեմբերի 19-ին, երբ Հյուսիսային Կորեան փորձարկել է սուզանավերի նոր բալիստիկ հրթիռը: