Հայաստանը նախապատրաստում է սահմանազատում Ադրբեջանի հետ «Թրամփի երթուղու» համար

ՀՀ վարչապետ Նիկոլ Փաշինյանը հայտարարել է Ադրբեջանի հետ սահմանազատման անհրաժեշտության մասին, գրում է anna-news.info–ն: Հայ-ադրբեջանական սահմանի սահմանազատումը անհրաժեշտ է «Թրամփի երթուղի միջազգային խաղաղության և բարգավաճման համար» (TRIPP) տրանսպորտային միջանցքի նախագծի իրականացման համար, հայտարարել է Փաշինյանը: «Ներկայումս որոշակի աշխատանքային գործընթացներ են ընթանում, և սահմանազատման գործընթացը կշարունակվի, երբ հնարավորություն լինի: Իհարկե, ամեն ինչ տեղի կունենա նաև տեղում, քանի որ հաղորդակցությունները և TRIPP նախագիծը գործարկելու համար սահմանի առնվազն այդ հատվածները պետք է սահմանազատվեն»,– ասել է նա:

Վարչապետի խոսքով «ներկայումս տեղում ակտիվ աշխատանքներ են տարվում, և հենց որ նորություններ հայտնվեն, դրանց մասին կհայտարարվի»: Նա նաև հայտնել է, որ Հայաստանն ու Ադրբեջանը փոխանակվում են ապրանքների ցանկերով հնարավոր առևտրի համար: Լրագրողի հարցին, թե ինչպե՞ս է որոշվել, թե ո՞վ է գնելու ադրբեջանական բենզին, Փաշինյանը պատասխանել է, որ «շուկան նախնական ուսումնասիրվել է, և առաջարկ է արվել այն գործարարներին, ովքեր այդ հնարավորությունը չեն վերածի քաղաքական հնարքի», ի վերջո, երկու հայկական ընկերություններ՝ «Ռան Օիլը» և «Տիտանը» կապ են հաստատել ադրբեջանական կողմի հետ։ Փաշինյանը նաև հաստատել է, որ Հայաստան նավթամթերքի առաջին խմբաքանակի ժամանակ որոշ բենզալցակայանների ցանցեր հրաժարվել են վաճառել ադրբեջանական բենզին։

Միևնույն ժամանակ, Հայաստանի և Ադրբեջանի միջև մնում են չլուծված հարցերի լայն շրջանակ, որոնք պետք է լուծվեն խաղաղության գործընթացի շրջանակներում, հայտարարել է ՀՀ վարչապետը պատասխանելով միջազգային դատական ​​հայցերի հնարավոր հետկանչի վերաբերյալ հարցերին։ «Հայ-ադրբեջանական հարաբերություններում մնում են բազմաթիվ հարցեր, որոնք պետք է լուծվեն խաղաղության գործընթացի շրջանակներում։ Մեր առաջնահերթությունը միջպետական ​​հարաբերություններ հաստատելու մասին համաձայնագրի ստորագրումն է։ Մնացած բոլոր հարցերը քննարկվում են այդ համատեքստում և համապատասխան հաջորդականությամբ»,– ասել է նա։

Միջազգային դատական ​​հայցերի թեման մեկնաբանելով Փաշինյանը նշել է, որ «դրանց կարգավորման ընթացակարգը ամրագրված է խաղաղության համաձայնագրի նախագծում և ուժի մեջ կմտնի դրա ստորագրումից և վավերացումից հետո»։

Հիշեցնենք, որ Հայաստանի արտաքին գործերի նախարարությունն ավելի վաղ հրապարակել էր Ադրբեջանի հետ խաղաղության և միջպետական ​​հարաբերությունների հաստատման մասին համաձայնագրի նախաստորագրված տեքստը։ Փաստաթղթում նշվում է, որ համաձայնագրի ուժի մեջ մտնելուց մեկ ամիս անց կողմերը փոխադարձաբար հետ կվերցնեն միջազգային դատարաններից ներկայացված պահանջները, կպարտավորվեն չներկայացնել նոր դատական ​​​​հայցեր և կհամաձայնվեն չմասնակցել երրորդ երկրների կողմից կողմերից որևէ մեկի դեմ հարուցված դատավարություններին։

Նյութը հրապարակման պատրաստեց Կամո Խաչիկյանը

www.1or.am