Թրամփը սպառնում է Իրանին. ի՞նչ է սպասվում Հայաստանին

Վաշինգտոնում այսօր կայանալու է նորընտիր նախագահ Դոնալդ Թրամփի երդմնակալության արարողությունը։ Իսկ նախօրեին նրա՝ ազգային անվտանգության հարցերով խորհրդական Մայք Ուոլցը հայտարարել է, որ «ժամանակն է առանցքային որոշումներ կայացնել» Իրանի հարցում։ Ըստ Ուոլցի, Իրանն այժմ «բարդ վիճակում է հայտնվել՝ շնորհիվ Նաթանյահուի և իսրայելցիների առաջնորդության», իսկ պաղեստինյան ՀԱՄԱՍ խմբավորումը «գլխատվել է զարմանալի «Փեյջեր և պորտատիվ ռացիա» գաղտնի գործողության արդյունքում»:

«Բոլորն ասում էին, որ «Հեզբոլլահի» առաջնորդ Նասրալլահին վերացնելը չափազանց էսկալացիոն, չափազանց սադրիչ կլինի, դա պետք չէ անել: Գիտե՞ք ինչ։ Նրանք դա արեցին։ Իսկ այժմ դա հանգեցրել է նրան, որ Լիբանանում իրական հնարավորություն է ստեղծվել: Դա հանգեցրեց Ասադի և նրա դաժան բռնապետության անկմանը: Դա հանգեցրեց ՀԱՄԱՍ-ի լիակատար մեկուսացմանը։ Նրանք միշտ մտածում էին, որ «հեծելազորը» «Հեզբոլլահի» հետ կգա հյուսիսից։ Այլևս այդպես չէ, և ես կարծում եմ, որ դա է հիմնական պատճառը, որ նրանք հիմա գործարք են կնքել: Իսկ Իրանի հակաօդային պաշտպանությունը ոչնչացված է։ Այսպիսով, եկել է կարևոր որոշումներ կայացնելու պահը, և մենք դա կանենք հաջորդ ամսվա ընթացքում»,- հայտարարել է Ուոլցը:

Այս սպառնալիքը հնչում է այն պայմաներում, երբ Հայաստանը համաձայնագիր է կնքում ԱՄՆ-ի, Իրանն էլ՝ Ռուսաստանի հետ։ Տարածաշրջանում իրավիճակի կտրուկ սրումը, ընդհուպ պատերազմի ծպտյալ ակնարկը, որ արել է ամերիկացի պաշտոնյան, կարող են ծանրագույն հետևանքներ ունենալ և, առաջին հերթին, Հայաստանի համար, որը գտնվում է իրադարձությունների կիզակետում։ Արդյո՞ք այս փաստը հասկանում են ՀՀ գործող իշխանությունները՝ Նիկոլ Փաշինյանի գլխավորությամբ։ Վստահաբար՝ այո, բայց և շարունակում են իրենց կործանարար քաղաքականությունն ընդդեմ բարեկամ պետությունների։ 

Մանիկ Ավետիսյան