ՔԱՂԱՔԱԿԱՆՈՒԹՅՈՒՆ ՀԱՍԱՐԱԿՈՒԹՅՈՒՆ ՄՇԱԿՈՒՅԹ ՍՊՈՐՏ ՄԱՄՈՒԼԻ ՏԵՍՈՒԹՅՈՒՆ ՏՆՏԵՍՈՒԹՅՈՒՆ ՖՈՏՈ ՎԻԴԵՈ ՎԵՐԼՈՒԾՈՒԹՅՈՒՆՆԵՐ ՊԱՏՄՈՒԹՅԱՆ ԱՅՍ ՕՐԸ ՄԻՋԱԶԳԱՅԻՆ ԱՄԵՆԱԸՆԹԵՐՑՎԱԾ ԻՐԱՎՈՒՆՔ


Պատերազմը հետաձգվում է․ ի՞նչ է խոստացել Փաշինյանը

ՎԵՐԼՈՒԾՈՒԹՅՈՒՆՆԵՐ

Վերջին երկու օրերին, թերևս առաջին հայացքից իրար հետ չկապված մի շարք իրադարձություններ հիմք են տալիս կարծելու, որ ռազմական լուրջ էսկալացիան առայժմ առնվազն հետաձգվում է, իսկ ղարաբաղյան կարգավորմամբ զբաղվող պետությունների ներկայացուցիչներին հաջողվել է հանգստացնել Ադրբեջանին։

Այս օրերին, Բաքվում էր գտնվում ԵԱՀԿ Մինսկի խմբի ամերիկացի համանախագահ, պետքարտուղարության կովկասյան բանակցությունների գծով գլխավոր խորհրդական Ֆիլիպ Ռիքերը։ Նա հանդիպել էր Ադրբեջանի արտգործնախարար Ջեյհուն Բայրամովի, նախագահ Իլհամ Ալիևի հետ։ Երեկ Բաքվից հեռանալուց առաջ, Ռիքքերը տեսաուղերձ է հղել, որը հրապարակել է Ադրբեջանում ԱՄՆ դեսպանատունը։

Ըստ համանախագահի՝ Հայաստանի և Ադրբեջանի հարաբերությունների կարգավորման հարցում իրական առաջընթաց է գրանցվել։ «Մենք գիտենք, որ խաղաղ գործընթացը հեշտ չէ, ես գիտեմ, որ հակամարտությունը տարիների ընթացքում մեծ դժվարություններ և տառապանքներ է պատճառել երկու կողմին, բայց ես հավատում են, որ խաղաղ ապագայի հույս կա, հուսով եմ խաղաղ բանակցությունների ընթացքում ձեռք բերված թափը կարող է պահպանվել և պատմության նոր էջ բացել»,- նշել է Ռիքերը։

Նույն այդ ժամանակ Թուրքիայի նախագահ Էրդողանի մամուլի քարտուղար և գլխավոր խորհրդական Իբրահիմ Քալընը հայտարարել է, թե Հայաստանի և Թուրքիայի միջև գործընթացը դրական է ընթանում։ «Անադոլու» գործակալության փոխանցմամբ՝ այս ամսվա սկզբին սահմանին տեղի է ունեցել տեխնիկական պատվիրակությունների հանդիպում, ընդ որում այս հանդիպման մասին առաջին անգամ նշում է միայն թուրք պաշտոնյան։ Քալընի խոսքով՝ երկու երկրների հատուկ ներկայացուցիչները կանոնավոր կապի մեջ են, քննարկում են տարբեր հարցեր՝ այդ թվում անձնագրերով սահմանը հատելու հնարավորությունը, քայլեր, որոնք կարող են ձեռնարկվել առաջիկայում։

Քալընը կրկին նշել է, որ Հայաստանի և Ադրբեջանի միջև գործընթացը պետք է ընթանա առողջ ճանապարհով։ Գաղտնիք չէ, որ Թուրքիան հայ-թուրքական հարաբերությունների կարգավորումը պայմանավորում է բացառապես Ադրբեջանի հետ հարաբերությունների կարգավորմամբ։ Եվ ըստ էության, վերջին շրջանում թուրքական կողմից մի շարք հայտարարություններ են հնչել, որոնք կասկածի տակ էին դնում երկու երկրների հարաբերությունների կարգավորումը։

Եվ այժմ դրական արձանագրումը Քալընի կողմից վկայում է, որ ինչ որ բան ղարաբաղյան կարգավորման գործընթացում գնում է առաջ։ Իհարկե հայկական կողմը առայժմ որևէ հայտարարություն չի տարածել, թե ինչ զիջումներ կան, դժվար է ասել՝ փոխզիջումներ է իրականացվել այս ճանապարհին։ Ադրբեջանը, որը զգալի երկար ժամանակ ցրում էր իրավիճակը ռազմական էսկալացիայի հասնելու հարցում, դեռևս նույն կերպ շարունակում է, սակայն թե՛ Ռիքերի և թե՛ եվրամիության ու Թուրքիայի հայտարարությունները վկայում են, որ որոշակի առաջընթաց կա, ուստիև ռազմական էսկալացիան առնվազն այս պահին դժվար է կանխատեսել։

Մանե Մսրյան

Historical Dates ՊԱՏՄՈՒԹՅԱՆ ԱՅՍ ՕՐԸ
Most Popular