ՏԻՄ ընտրությունները դրեցին «Քաղաքացիական պայմանագրի» իշխանազրկման սկիզբը

Երեկ՝ դեկտեմբերի 5-ին տեղական ինքնակառավարման մարմինների ընտրություններ էին խոշորացված 36 համայնքներում։ Ու թեև իշխող «Քաղաքացիական պայմանագրի» պատգամավորները կեղծում են, թե հաղթել են 25 համայնքներում, իրականում Փաշինյանի ղեկավարած ուժը կարող է դառնորեն սգալ ցուցադրած արդյունքների համար։ Նախնական տվյալներով, «Քաղաքացիական պայմանագիրը» համայնքապետ կունենա 19 համայնքներում, ևս մեկ համայնքում՝ հնարավոր է կոալիցիա ստեղծվի իշխանամերձ այլ ուժի հետ։

ՏԻՄ ընտրություններին, նախնական տվյալներով, մասնակցել է 472 հազար 528 ընտրող կամ քվեարկելու իրավունք ունեցող քաղաքացիների 42.48 տոկոսը: Ամենաակտիվը Լոռու մարզի Թումանյան համայնքում են քվեարկել` 69.78 տոկոս, որտեղ հաղթանակ է տարել «Հանրապետություն» կուսակցությունը, իսկ ամենապասիվը` Արմավիրի Արմավիր համայնքում` 20.73 տոկոս: Արմավիրում առաջադրվել էր միայն «Քաղաքացիական պայմանագիրը»։ Իշխանական կուսակցությունը պարտվել է մի քանի խոշոր քաղաքներում:

Մասիսի գործող քաղաքապետ, քրեական գործով մեղադրյալ Դավիթ Համբարձումյանի գլխավորած դաշինքը է հաղթել «Քաղաքացիական պայմանագրին»՝ ապահովելով Համբարձումյանի հետագա պաշտոնավարումը: Աբովյանի քաղաքապետ է ընտրվել «Բարգավաճ Հայաստան»-ի թեկնածու Գագիկ Ծառուկյանի թիկնազորի նախկին պետ, Ազգային ժողովի նախկին պատգամավոր Էդուարդ Բաբայանը: Վանաձորում հաղթել է նախկին քաղաքապետ Մամիկոն Ասլանյանի գլխավորած դաշինքը՝ քվեների մոտ 38,6 տոկոսով։ Իսկ նրա տեղակալ Արկադի Փելեշյանի գլխավորած ցուցակի քվեները բավարար են՝ ՔՊ-ի դեմ կոալցիա ստեղծելու համար։

Ամենաուշագրավ և քաղաքական ընտրությունները կայացել են Գեղարքունիքի մարզի Ծովագյուղ և Սեմյոնովկա գյուղերում։ Այդ գյուղերի որևէ բնակիչ չի գնացել ընտրության։ Դիտորդական կազմակերպություններն էլ էական խախտումներ են արձանագրել, հանցագործության մասին հաղորդումներ ներկայացրել իրավապահ մարմիններին։ Ընտրակաշառք և ուղղորդումներ, գաղտնիության խախտումներ ու կուտակումներ, կրկնակի քվեարկության փորձեր, քվեաթերթիկը տեղամասերից դուրս հանելու դեպքեր։ Հեղափոխական կարգախոսներով իշխանության եկած ուժը չի խորշում ընդօրինակել և կատարելագործել արատավոր բոլոր օրինակները։ Ու այդքանով հանդերձ, չի կարողանում ապահովել իր աներկբա հաղթանակը։ ՏԻՄ ընտրությունները դրեցին «Քաղաքացիական պայմանագրի» իշխանազրկման սկիզբը։

Կարեն Հակոբյան