Արման Թաթոյանին փոխարինելու են Բադասյանի մտերիմով

Մարդու իրավունքների պաշտպան Արման Թաթոյանը 44-օրյա պատերազմից հետո դարձել է Հայաստանի միակ արդյունավետ աշխատող պաշտոնյան, ով իր անձնական բարձր հեղինակության և կատարած աշխատանքի շնորհիվ ահռելի վարկանիշ ունի հանրության շրջանում։ Նրա ակտիվությունը, «Քաղաքացիական պայմանագրի» հանցավոր թերացումները բացահայտելու քայլերը, սահմանամերձ բնակավայրերի իրավունքները պարբերաբար վերհանելը դարձել են Նիկոլ Փաշինյանի և նրա կողմնակիցների թշնամության պատճառ։

Անվտանգության խորհրդի քարտուղար Արմեն Գրիգորյանը ՄԻՊ-ին մեղադրեց քաղաքական հայտարարություններ անելու մեջ, սպառնաց, թե Թաթոյանին ընդամենը մի քանի ամիս է մնացել։ Մարդու իրավունքների պաշտպանը իշխանական լրատվամիջոցների և պաշտոնյաների թիրախն է դարձել։ ՀՀ Սահմանադրությամբ, Մարդու իրավունքների պաշտպանը նշանակվում է վեց տարի ժամկետով, նույն մարդը չի կարող երկրորդ անգամ զբաղեցնել այդ պաշտոնը։ Սահմանադրության 192-րդ հոդվածի 2-րդ կետը սահմանում է․ «Մարդու իրավունքների պաշտպան կարող է ընտրվել բարձրագույն կրթություն ունեցող, պատգամավորին ներկայացվող պահանջներին համապատասխանող, հասարակության մեջ բարձր հեղինակություն վայելող յուրաքանչյուր ոք»։

Արման Թաթոյանի ժամկետն ավարտվում է փետրվարին․ «Քաղաքացիական պայմանագիրը» վերջապես կողմնորոշվել է, թե ում է առաջադրելու այդ պաշտոնի համար, իսկ խորհրդարանական խմբակցությունն էլ առանց այլևայլությունների կընտրի այդ թեկնածուին։

«Քաղաքացիական պայմանագիր» խմբակցության քարտուղար Արթուր Հովհաննիսյանը ֆեյսբուքյան գրառմամբ հայտնել է, թե խմբակցության հերթական նիստի ընթացքում, որոշում է կայացվել Մարդու իրավունքների պաշտպանի պաշտոնում առաջադրել Քրիստինե Գրիգորյանի թեկնածությունը։ Վերջինս եղել է Արարատ Միրզոյանի խորհրդականը, 2019 թվականի հուլիսի 3-ի որոշմամբ նշանակվել է ՀՀ արդարադատության նախարարի տեղակալ, իսկ այս տարվա ապրիլին նշանակվել արդարադատության նախարարի առաջին տեղակալ։ Նախարարություն նա տեղափոխվել էր նախկին նախարար Ռուստամ Բադասյանի միջնորդությամբ, համարվում է վերջինիս կադրը։ Ամենևին չենք թերագնահատում Գրիգորյանի իրավական գիտելիքները, հատկապես, որ այս ընթացքում Քրիստինե Գրիգորյանը որևէ սկանդալում չի հայտնվել, ի տարբերություն իշխանության այլ ներկայացուցիչների՝ անհեթեթ հայտարարություններ չի արել։ Արդյո՞ք նա ունի բարձր հեղինակություն հասարակության մեջ, ինչպես պահանջում է Սահմանադրությունը։ Թերևս, այս նշանակմամբ ՔՊ-ն կվերանցի ՄԻՊ ինստիտուտի անկախությունը, իսկ նոր օմբուդսմենը կդառնա գործադիր իշխանության կցորդը։

Կարեն Անանյան