ՏԻՄ ընտրությունների հնարավոր արդյունքը ահաբեկել է Նիկոլ Փաշինյանին
ՎԵՐԼՈՒԾՈՒԹՅՈՒՆՆԵՐ
Դեկտեմբերի 5-ին կայանալիք ՏԻՄ ընտրություններից առաջ իշխանությունը լուրջ մտահոգություններ ունի մի շարք համայնքներում կանխատեսելի պարտության հեռանկարից․ որոշ համայնքներում ուսումնասիրություններ, փակ հարցումներ են իրականացվել հատուկ ծառայությունների խողովակներով, և դրանց արդյունքները, մեղմ ասած, հուսադրող չեն Նիկոլ Փաշինյանի թիմի համար։
Բացի Նիկոլ Փաշինյանի և նրա ապիկար թիմի նկատմամբ առկա խիստ ընդգծված և օբյեկտիվ բացասական վերաբերմունքից, իրավիճակը խորանում է նաև իշխանության առանձին թեկնածուների նկատմամբ մարզերի բնակիչների կարծիքի պատճառով։ Իշխանություններն առանց երկար մտածելու տարբեր ծաղրածուների, վարկաբեկված անձանց, նախկինների օրոք անմաքուր վարքով աչքի ընկնողների է առաջադրել, իսկ շատ դեպքերում «Քաղաքացիական պայմանագիրը» մամուլից է տեղեկանում իրենց թեկնածուների խոցելի տեղերի մասին։
Վարդենիսի քաղաքապետի իշխանական թեկնածու Արամ Մելքոնյանն, օրինակ, օրեր առաջ Երևանում փրկության գործողություն էր բեմադրել։ Իր համերկրացուն բերել էր Երևան, «Հաղթանակ» կամրջի մոտ տեսագրել՝ իբր համոզում է և փրկում ինքնասպանությունից։
Գավառում «Քաղաքացիական պայմանագրի» ցուցակը գլխավորող Նարեկ Գրիգորյանը Գեղարքունիքի նախկին փոխմարզպետն է, ով բանակից ժամանակին ազատվել էր ինքնավնասում անելու պատճառով։ Իսկ մարզում էլ հայտնի է քրեական մի գործով, որտեղ նրա աներն ու կինը անցնում են հափշտակության դեպքերով։
Վայքում իշխանական թեկնածուն՝ Մխիթար Մաթևոսյանը Վայքի տարածաշրջանում հայտնի է որպես «կրիմինալ» անցյալ ունեցող անձ, ով առանձնապես խոշոր չափերի վնաս է հասցրել պետությանը՝ կաֆել-մետլախի հափշտակություն անելով։
Իրականացված հարցումները մտահոգիչ են ՔՊ-ի համար, պարզվել է, թե նույնիսկ կոալիցիայի շանս չունեն, ընդդիմադիր որոշ թեկնածուներ կեսից ավելի քվեներ են ստանալու և միանձնյա ղեկավարում ստանձնեն։ Մասնավորապես, մեր աղբյուրի պնդմամբ՝ նույն Վայքում անցկացված հարցմամբ պարզվել է, որ Կառլեն Մինասյանը 50 տոկոսից ավելի քվե է ստանալու։ Իշխող ուժի համար բարդ է լինելու նաև Ապարանում, որտեղ ընդդիմադիր «Եղիազարյան» դաշինքը բավական բարձր հեղինակություն ունի, իսկ իշխանության թեկնածուն Աղվան Հովսեփյանի նախկին հովանավորյալն է, ՀՀԿ նախկին անդամ։ Հարցումները նաև պատրվակ են դարձել իշխանության համար՝ ճնշումներ բանեցնելու բնակչության, պետական ծառայողների դեմ, որպեսզի հնարավորինս նվազեցնի ընդդիմության քվեները, որ «Քաղաքացիական պայմանագրի»՝ թեկուզ սակավ քվեներ ստացած թիմերը կարողանան կոալիցիաներ կազմեն այլ ուժերի հետ։
Կարեն Նիկողոսյան
