Մարդու անձնական տվյալների պաշտպանությունը պետք է բարձր մակարդակի լինի
ՔԱՂԱՔԱԿԱՆՈՒԹՅՈՒՆ
Եվրոպացի փորձագետները կանխատեսում են, որ ևս 10 տարի կպահանջվի, մինչև Հայաստան-ԵՄ միջև վիզաների ազատականացման գործընթացը կսկսի գործել։
Այս թեմայով զրուցել ենք քաղաքագետ Ստեփան Գրիգորյանի հետ։
Հարցին,թե ո՞ր փուլում է այս հարցի լուծումը քաղաքագետն ասաց. «Նման կարծիքներ կան փորձագիտական մակարդակով, բայց դա Եվրամիության պաշտոնական կարծիքը չէ։ Եվրահաձնաժողովն այդ հարցում ասում է՝ մենք բաց ենք, կաշխատենք և կնայենք զարգացումներին։ Երբ մենք ասում ենք՝ վիզաների ազատականացում, դա պարունակում է մի շարք քայլեր, որոնք Հայաստանը պետք է անի՝ օրենսդրական դաշտի կատարելագործում, տեխնիկական հարցերի լուծում։
Օրինակ՝ կարևորագույն հարց է ամբողջովին կենսաչափական անձնագրերին անցում կատարելը։ Եվրամիության համար շատ կարևոր է, որ այդ տեխնիկական և օրենսդրական բարեփոխումներն արվեն։ Եվ դա արվում է փոխադարձ համագործակցությամբ։ Ակնհայտ է, որ Covid-ի համավարակն այս հարցերը երկրորդ պլան է մղել։ Covid-ի պատճառով Եվրոպան ստիպված է փակվել ամբողջ աշխարհի առջև, ոչ միայն Հայաստանի։ Դա օբյեկտիվ խնդիր է։ Եվ Covid-ի պայմաններում սպասել, որ այդպես հեշտ վիզաների ազատականացում կլինի, իրատեսական չէ։ Բայց եթե ենթադրենք վաղը Covid էլ չլինի, միևնույն է, պետք է ինչ-ինչ քայլեր արվեն, որպեսզի ճանապարհային քարտեզ ստանանք։ Հայաստանը նախքան Covid-ի համավարակը շատ լուրջ քայլեր էր արել, առաջնթաց կար, բայց և օրենսդրական դաշտի փոփոխություն է պետք, և ամենակարևորը՝ մարդու անձնական տվյալների պաշտպանությունը պետք է բարձր մակարդակի լինի։ Այստեղ մենք ունենք խնդիրներ։ Բոլոր հարցերը լուծելի են, բայց Հայաստանը ծանր վիճակում է, այդ հարցերը կառավարության համար այսօր հրատապ չեն։ Այսինքն՝ չպետք է մտածենք, թե դա անլուծելի հարց է, բայց միաժամանակ պետք է հասկանանք, որ մի քանի տարում էլ արագ չի լուծվելու»։
Սոնա Գիշյան
