Վրաստանը հրաժարվել է մասնակցել «3 + 3» բանակցային ձևաչափին
ՀԱՍԱՐԱԿՈՒԹՅՈՒՆ
fondsk.ru–ն գրում է, որ Թբիլիսին հայտարարել է «3 + 3» բանակցային ձևաչափին (Ադրբեջան, Հայաստան, Վրաստան + Ռուսաստան, Թուրքիա, Իրան) մասնակցելուց հրաժարվելու մասին։ Այդ ձևաչափով բանակցությունները պետք է լուծեին Հարավային Կովկասում տնտեսական և տրանսպորտային կապերի ապաշրջափակման հարցը։ «Վրաստանը չի մասնակցի «վեց»–ի նախաձեռնության հարթակին։ Այդ մասին ես հայտնել եմ ավելի վաղ Թուրքիա և Ադրբեջան կատարած իմ այցերի ժամանակ»,–
ասել է Վրաստանի փոխվարչապետ, արտաքին գործերի նախարար Դավիթ Զալկալիանին խորհրդարանում ունեցած ելույթի ժամանակ։ Չնայած դեռ հոկտեմբերին նա պնդում էր, որ «Վրաստանը պետք է գոնե ինչ որ ձևով ներկայացված լինի աշխարհաքաղաքական նման խոշոր նախագծերում» չնայած ռուս-վրացական հարաբերություններում առկա բոլոր խնդիրներին։ Սակայն ավելի ուշ Վրաստանի ԱԳՆ-ի ռազմավարական հաղորդակցությունների վարչությունը հայտարարել էր, որ լրագրողները պարզապես սխալ են հասկացել ԱԳ նախարարի հայտարարությունը և ոչ ճիշտ լուսաբանել այդ հայտարարությունը լրատվամիջոցներում։
«3 + 3» բանակցային ձևաչափի ստեղծման նախաձեռնությունը քննարկվել է հոկտեմբերին Մոսկվայում ՌԴ ԱԳ նախարար Սերգեյ Լավրովի և Իրանի արտգործնախարար Հոսեյն Ամիր Աբդոլլահիյանի հանդիպման ժամանակ, ովքեր ողջունել են այդ նախաձեռնությունը, քանի որ տարածաշրջանում տնտեսական և տրանսպորտային կապերի ապաշրջափակումը չի հակասում երկրների շահերին: Ե՛վ Ադրբեջանը, և՛ Թուրքիան դրական են արձագանքել բանակցային նման ձևաչափի ստեղծմանը, իսկ Երևանում այն որոշ զգուշավորությամբ է ընդունվել։ Այն ժամանակ ՌԴ ԱԳՆ-ն նշել էր, որ Վրաստանը նույնպես կարող է իր շահերը տեսնել նման մեխանիզմի ստեղծման մեջ։ Սակայն Վրաստանը կարծում է, որ միայն երեք երկրներ պետք է լուծեն տարածաշրջանի բոլոր խնդիրները, որոնք են Վրաստանը, Հայաստանը և Ադրբեջանը, հնարավոր են տնտեսական նախագծեր, որոնք կհետաքրքրեն բոլոր երեք երկրներին և կթուլացնեն լարվածությունը տարածաշրջանում։ «Մեր այլընտրանքը մեր առաջարկած նախաձեռնություններն են, այդ թվում «եռյակի»՝ Հարավային Կովկասի երեք երկրների ձևաչափով։ Դրան կմասնակցեն Վրաստանը, Ադրբեջանը և Հայաստանը։ Թբիլիսին պետք է հարթակ դառնա հարավկովկասյան երեք երկրների միջև երկխոսության համար»,– ասել է Զալկալիանին։
Նյութը հրապարակման պատրաստեց Կամո Խաչիկյանը
