Վարչապետը խոստովանեց, որ հարցն արդեն հասել է մեր պետականության չգոյությանը
ՔԱՂԱՔԱԿԱՆՈՒԹՅՈՒՆ
Երկու օր առաջ վարչապետ Նիկոլ Փաշինյանը առցանց ասուլիսի ժամանակ պատասխանում էր լրագրողների և ՀԿ֊ների հարցերին։
Այս թեմայով զրուցել ենք քաղաքագետ Արմեն Բաղդասարյանի հետ։
Հարցին, թե ի՞նչ կարևոր կետեր կառանձնացնեք Նիկոլ Փաշինյանի առցանց ասուլիսից, ո՞րն էր վարչապետի ասելիքը քաղաքագետը ասաց. «Որևէ նոր բան չասվեց։ Հիմնական ասելիքն այն էր, որ ճանապարհների ապաշրջափակման հարցում մեր ու Ադրբեջանի դիրքորոշումները չեն համընկնում, որ մենք շատ լուրջ ճնշումների տակ ենք, խոստովանեց, որ հարցն արդեն հասել է մեր պետականության չգոյությանը, որ Ադրբեջանն ու Թուրքիան ընդհանրապես վիճարկում են՝ արդյոք մենք անկախ պետականություն պիտի ունենա՞նք, թե՞ ոչ։ Մի խոսքով՝ ներկայացրեց, թե ինչ ծանր վիճակում ենք, կոնկրետ ես տպավորություն ստացա, որ նա խնդիրները հասկանում է, բայց որևէ լուծում չունի»։
Հարցին, թե ստեղծված իրավիճակում ի՞նչ սպասել, Հայաստանն այդ մարտահրավերներին ինչպե՞ս պետք է դիմակայի. «Այդ մարտահրավերներին դիմակայելու համար Հայաստանը պետք է ունենա քաղաքական իշխանություն, իսկ երեկվա իր ելույթից տպավորություն ստացվեց, որ Հայաստանն այդպիսի իշխանություն չունի: Նիկոլ Փաշինյանը չէր խոսում՝ որպես պետության ղեկավար, նրա խոսքը պետության ղեկավարի խոսք չէր, որովհետև պետության ղեկավարն իրավունք չունի ասել, օրինակ՝ իսկ գուցե մեր հիմնական սխալն այն էր, որ մենք մեր անկախությունը լո՞ւրջ ենք ընդունել։ Նման բան չի կարող ասել պետության ղեկավարը, որը նաև այդ պետության անկախության ու տարածքային ամբողջականության երաշխավորն է։ Այդպիսի բան կարող է ասել հրապարակախոսը, լրագրողը, ուրիշ մեկը, բայց ոչ պետության ղեկավարը։ Պետության ղեկավարի խոսք չէր նաև այն, որ ասում է՝ ես ուզում եմ անկեղծորեն հարցնել Ադրբեջանին ու Թուրքիային՝ դուք ուզում եք մեզ կոտորե՞լ, թե՞ չեք ուզում։ Այսինքն՝ ի՞նչ է ակնկալում, որ նրանք էլ պետք է անկեղծորեն ասեն, թե, այո՛, ուզում ենք ձեզ կոտորել։ Անհասկանալի է, դրա համար եմ ասում, որ դա պետության ղեկավարի խոսք չէր»։
Սոնա Գիշյան
